- पैली कुरिन्थियों 15 - Bundeli Holy Bible

¹ हे भईया हरौ, मैं तुम हां ओई भलो सन्देसो बतात आंव जौन पेंला सुनाओ हतो, जिए तुम ने मान सोई लओ हतो और जी में तुम पक्के सोई आव।

² ओई से तुमाओ तरन तारन सोई होत आय, जदि ऊ भले सन्देसे को जौन मैंने तुम हां सुनाओ हतो सुमरन करत आव; नईं तो तुमाओ बिसवास करबो अकारथ भओ।

³ ऐई से मैंने सब से पेंला तुम हां ओई बात पोंचा दई, जौन मोहां मिली हती, कि पवित्तर धर्मपोथी के बचन के अनसार यीशु मसीह हमाए पापों के लाने मर गओ।

⁴ और गाड़ो गओ; और पवित्तर धर्मपोथी के अनसार तीसरे दिना जी सोई उठो।

⁵ और कैफा को, फिन बारह जनों हां दिखाई दओ।

⁶ फिन पांच सौ से अधक भाईयन हां एक संग्गै दिखाई दओ, जिन में से बिलात के अबै लौ जीयत आंय अकेले कैऊ बड़ा गए।

⁷ फिन याकूब हां दिखाई दओ, तब सबरे चेलन हां दिखाई दओ।

⁸ और सबरन के पाछें मोहां सोई दिखाई दओ, जौन मानो आधे दिना कौ जन्मो आंव।

⁹ कायसे कि मैं चेलन में सबई से हलको आंव, इते लौ कि चेला कहाबे के जोग सोई नईंयां, कायसे कि मैंने परमेसुर की समाज को सताओ हतो।

¹⁰ परन्त मैं जो कछु आंव, परमेसुर की दया से आंव: और उनकी जौन दया मो पे भई आय, बा अकारथ नईं गई; परन्त मैंने उन सबरन से बढ़के मैनत सोई करी: जानो कि जौ मोरी कुदाऊं से नईं भओ परन्त परमेसुर की दया से जौन मो पे हती।

¹¹ सो चाए मैं होओं, चाए बे होबें, हम जौई परचार करत आंय, और ऐई पे तुम ने बिसवास धरो आय।

¹² सो जब मसीह कौ जौ परचार करो जात आय, कि बो मरे भयन में से जी उठो, तो तुम में से कैऊ काय हां कैत आंय, कि मरे भयन कौ जी उठबो हैई नईंयां।

¹³ जदि मरे भयन को जी उठबो नईंयां, तो मसीह सोई नईं जी उठो।

¹⁴ जदि मसीह नईं जी उठो, तो हमाओ परचार करबो सोई अकारथ आय; और तुमाओ बिसवास करबो सोई अकारथ आय।

¹⁵ जाने कि हम परमेसुर के लबरे गवाय ठैरे; कायसे कि हम ने परमेसुर के बारे में जा गवाय दई, कि उन ने मसीह हां जिला दओ परन्त जदि मरे भए सांचई में नईं जिलाए जाते, तो उन ने मसीह हां सोई नईं जिलाओ।

¹⁶ और जदि मरे भए नईं जी उठत, तो मसीह सोई नईं जी उठो।

¹⁷ और जदि मसीह नईं जी उठो, तो तुमाओ बिसवास अकारथ आय; और तुम अब लौ अपने पापन में उलझे आव।

¹⁸ और जौन मसीह में बिसवास धरें मर गए, बे सोई नास भए।

¹⁹ जदि हम अकेले अबई जीयत भए मसीह सें आसा राखत आंय, तो हम सबरे मान्सन से अभागे आंय।

²⁰ परन्त सांचई मसीह मरे भयन में से जी उठो आय, और जौन सो गए आंय, उन में सब से पेंला जीबेवारो भओ।

²¹ कायसे कि जब मान्स से मौत आई; तो मान्स से मरे भयन को जी उठबो सोई आओ।

²² और जैसे आदम में सबरे मरत आंय, ऊं सई मसीह में सबरे जिलाए जै हैं।

²³ परन्त सबई कोई अपनी अपनी बेरा पे; पैलो फल मसीह; फिन मसीह के आबे पे उनके जनें।

²⁴ ईके पाछें अन्त हुईये; ऊ बेरा बो सबरो राज और सबरे अधकार और बल सक्ति हां खतम करके राज्य हां परमेसुर बाप के हाथ में दे दै है।

²⁵ कायसे कि जब लौ बो अपने बैरियन हां अपने गोड़न तरें न ले आ है, तब लौ उन कौ राज करबो जरूरी आय।

²⁶ सबई से पाछें कौ बैरी जौन नास करो जै है बा मौत आय।

²⁷ कायसे कि परमेसुर ने सबई कछु उनके गोड़न तरें कर दओ आय, परन्त जब बो कैत आय कि सबई कछु ऊके अधकार में कर दओ गओ आय, तो जा बात साफ आय, कि जीने सबई कछु उनके अधकार में कर दओ, बो खुद अलग रओ।

²⁸ और जब सबई कछु उनके अधकार में हो जै है, तो बेटा सोई खुद उनके अधकार में हो जै है, जीने सबई कछु उनके अधकार में कर दओ; जीसे सबई में परमेसुर सब कछु होबे।

²⁹ नईं तो जौन मान्स मरे भयन के लाने बपतिस्मा लेत आंय, बे का कर हैं? जदि मुरदे जी उठतई नईंयां, तो फिन काय उन के लाने बपतिस्मा लेत आंय?

³⁰ और हम सोई काय सबरे हार जोखम में पड़े रैत आंय?

³¹ हे भईया हरौ, मोय ऊ घमण्ड की कौल जौन हमाए पिरभु यीशु मसीह में, मैं तुमाए बारे में करत आंव, कि मैं रोजीना मरत आंव।

³² जदि मैं मान्सन की रीत पे इफिसुस में बन जनावर से लड़ो, तो मोय का लाभ भओ? जदि मरे जिलाए नईं जै हैं, तो आओ, खाबें-पीबें, कायसे कल तो मर जै हैं।

³³ धोखा न खाओ, बुरओ संग साथ साजे चरित्र को बिगाड़ देत आय।

³⁴ धरम के लाने जाग उठो और पाप न करो; कायसे कि कितेक ऐसे आंय जौन परमेसुर को नईं जानत, मैं तुम हां लजाबे हां जौ कैत आंव।

³⁵ अब कोई जौ कै है, कि मरे भए कौन भांत से जी उठत आंय, और कौन तरहां की देयां संग्गै आत आंय?

³⁶ अरे मूरख, जो कछु तें बोत आय, जब लौ बो न मरे, जिलाओ नईं जात।

³⁷ तें जो बोत आय, जा बा देयां नईंयां जौन पैदा होबेवारी आय, परन्त खालस दाना आय, चाए गोंऊं कौ, चाए कोऊ और नांज कौ।

³⁸ परन्त जब परमेसुर अपनी मन्सा के अनसार ऊहां देयां देत आय; और हर एक बीज हां ऊ की खास देयां।

³⁹ सबई की देयां एक भांत नईंयां, परन्त मान्सन की देयां और आय, और जानवरों की देयां और आय; पंछियन की देयां और आय, मछरियन की देयां और आय।

⁴⁰ सरगवारन की देयां आय, और संसार वारन की देयां सोई आय: परन्त सरगवारन की देयां कौ तेज और आय, और संसार वारन कौ और।

⁴¹ सूरज कौ तेज और आय, चांद कौ तेज और आय, और तारागणों कौ तेज और आय, (कायसे कि एक तारे से दूसरे तारे के तेज में अन्तर आय)।

⁴² मरे भयन कौ जी उठबो सोई ऐसई आय, देयां मिटबेवारी दसा में बोई जात आय और न मिटबेवारे रूप में जी उठत आय।

⁴³ बो बिना आदर के संग्गै बोई जात आय, और तेज के संग्गै जी उठत आय; कमजोरी के संग्गै बोई जात आय; और बड़े बल के संग्गै जी उठत आय।

⁴⁴ संसारी देयां बोई जात आय, और आत्मिक देयां जी उठत आय, जैसे संसारी देयां आय, तो आत्मिक देयां सोई आय।

⁴⁵ ऐसई लिखो सोई आय, कि पैलो मान्स, आदम जीबेवारो प्रानी बनो, और आखरी आदम, जीवन देबेवारो आत्मा बनो।

⁴⁶ परन्त पैलो आत्मिक न हतो, पर संसार कौ हतो, ईके पाछें, आत्मिक भओ।

⁴⁷ पैलो मान्स धरती से, जाने कि माटी कौ हतो; दूसरो मान्स सरग कौ आय।

⁴⁸ जैसे बो माटी कौ हतो, ऊं सई और माटी के आंय; और जैसो बो सरग कौ आय, ऊं सई और सरगवारे आंय।

⁴⁹ और जैसे हम ने ऊकौ रूप, जौन माटी कौ हतो ले लओ, ऊंसई ऊ सरगवारे कौ रूप सोई ले लें हैं।

⁵⁰ हे भईया हरौ, मैं जौ कैत आंव कि मांस और रकत परमेसुर के राज के अधकारी नईं हो सकत, और न नास होबेवारो अमरता कौ अधकारी हो सकत आय।

⁵¹ हेरो, मैं तुम से भेद की बात कैत आंव: हम सबरे तो न मर हैं, पर सबरे बदल जै हैं।

⁵² और जो छिन्न भर में, पलक झपकत पिछली तुरही फूंकत हुईये: और मरे भए अमरता की दसा में जिलाए जै हैं, और हम बदल जै हैं।

⁵³ कायसे कि जरूरी आय, जा मिटबेवारी देयां अमरता हां पैर लेबे, और जा मरबेवारी देयां अमरता हां पैर लेबे।

⁵⁴ और जब जा नास होबेवारी अविनास हां पैर लै है, और जा मरबेवारो अमरता हां पैर लै है, तब बो बचन जौन लिखो आय पूरो हो जै है, कि जय ने मौत हां निगल लओ।

⁵⁵ हे मौत तोरी जय कां रई?

⁵⁶ हे मौत तोरो डंक कां रओ? मौत कौडंक पाप आय; और पाप कौ बल नेम व्यवस्था आय।

⁵⁷ परन्त परमेसुर कौ धन्न होबे, जौन हमाए पिरभु यीशु मसीह के द्वारा हम हां जीत दिलात आय।

⁵⁸ सो हे मोरे प्यारे भईया हरौ, पक्के बने रओ, और पिरभु के काम में बढ़त जाओ, कायसे कि जानत आव, कि तुमाई मैनत पिरभु में अकारथ नईंयां।