- पैली कुरिन्थियों 13 - Bundeli Holy Bible

¹ जदि मैं मान्सन और सरगदूतन की बोलियां बोलों, और प्रेम न धरों, तो मैं ठनठानात भओ पीतल, और झनझानात भई झांझ आंव।

² और जदि मैं अगमवानी कर सकों, और सब भेदों और ज्ञान को समजों, और मोय इते लौ पक्को बिसवास होबे, कि मैं पहारवन हां हटा देओं, परन्त प्रेम न धरों, तो मैं कछु लौ नईंयां।

³ और जदि मैं अपनी सबरी जादाद गरीब गुरवन को खबा देओं, या अपनी देयां बारवे के लाने दे देओं, और प्रेम न धरों, तो मोहां कछु भी फायदा नईंयां।

⁴ प्रेम धीरज धरत आय, दया करबेवारो आय; प्रेम बैर की गांठ नईं बाधें रैत; प्रेम अपनी बड़वाई नईं करत, और घमण्ड में नईं बनो रैत।

⁵ बो बुरई चाल नईं चलत, बो अपने भले की नईं सोचत, खिसयात नईंयां, बुरओ नईं मानत।

⁶ बुरए काम से खुस नईं होत, परन्त संचाई से खुस होत आय।

⁷ बो सबरी बातें सह लेत आय, सबरी बातन कौ बिसवास करत आय, सबरी बातन में आसा राखत आय, सबरी बातन में धीरज धरत आय।

⁸ प्रेम कभऊं टलत नईंयां; अगमबानी होबें तो मिट जै हैं; भाषाएं बोली होबें तो जात रै हैं; ज्ञान होबे, तो मिट जै है।

⁹ कायसे कि हमाओ ज्ञान आधो आय, और हमाई अगमबानी आधी।

¹⁰ परन्त जब सर्वसिद्ध आ है, तो आधो मिट जै है।

¹¹ जब मैं हलको बच्चा हतो, तो मैं हलके बच्चा घांई बोलत हतो, बच्चन के जैसो हिया हतो, बच्चन के जैसी समज हती; परन्त जब सियानो हो गओ, तो बच्चन की बातें छोड़ दईं।

¹² अब हम हां ऐना में धुंधलो सौ दिखाई देत आय; परन्त ऊ बेरा आमूं सामूं हेर हैं, अबै तो मोरो ज्ञान अधूरो आय, परन्त ऊ बेरा भली भांत चीन्ह हों, जैसो मैं चीनो गओ आंव।

¹³ पर अब बिसवास, आसा, प्रेम जे तीनईं पक्के से बने रैत आंय, परन्त इन में प्रेम सब से बढ़ के आय।