- पैली कुरिन्थियों 11 - Bundeli Holy Bible

¹ तुम मोरी सी चाल चलो जैसो मैं मसीह की सी चाल चलत आंव।

² हे भईर्या हरौ, मैं तुमाई बड़बाई करत आंव, कि तुम सबरी बातन में मोहां सुमरन करत आव: और जौन ब्योहार मैंने तुम हां सिखा दए हते, तुम ऊं सई करत आव।

³ सो मैं चाहत आंव, कि तुम जौ जानो, कि सबरे मन्सेलूअन कौ मूड़ मसीह आय: और बईयर कौ मूड़ मन्सेलू आय: और मसीह कौ मूड़ परमेसुर आय।

⁴ जौन मन्सेलू मूड़ ढांक के बिन्तवाई या अगमबानी करत आय, बो अपने मूड़ कौ मान नईं करत।

⁵ परन्त जौन बईयर मूड़ उगारें बिन्तवाई या अगमबानी करत आय, बो अपने मूड़ कौ मान नईं करत, कायसे बा तो मुन्डी होबे के बिरोबर आय।

⁶ जदि बईयर मूड़ न ढांके, तो बाल सोई कटवा लेबे; जदि बईयर के लाने बाल कटवाओ या मुड़वाओ लाज की बात आय, तो पल्लू से मूड़ ढांके।

⁷ हओ, मन्सेलू को अपनो मूड़ ढांकबो सई नईंयां, कायसे बौ परमेसुर कौ रुप जैसो और मईमा आय; परन्त बईयर मन्सेलू की मइ्रर्मा आय!

⁸ कायसे मन्सेलू बईयर से नईं भओ, परन्त बईयर मन्सेलू से भई आय।

⁹ और मन्सेलू बईयर के लाने नईं रचो गओ, परन्त बईयर मन्सेलू के लाने रची गई आय।

¹⁰ ई लाने सरगदूतन के काजें बईयर हां सई आय, कि अधीनता कौ मान अपनी मूड़ पे धरे।

¹¹ परन्त पिरभु में न तो बईयर बिना मन्सेलू के, न मन्सेलू बिना बईयर के आय।

¹² कायसे जैसे बईयर मन्सेलू से आय, ऊं सई मुन्सेलू बईयर के द्वारा आय; परन्त सबरी बस्तें परमेसुर से आंय।

¹³ तुम आपई सोचो, का बईयर को उघाड़े मूड़ परमेसुर से बिन्तवाई करबो साजो आय।

¹⁴ का तुम हां नईं पता, कि जदि मन्सेलू बड़े बाल राखे, तो ओई कौ मान घटत आय।

¹⁵ परन्त जदि बईयर बड़े बाल राखे; तो ऊके लाने सुन्दरता आय, कायसे बाल ऊ को ओढ़नी के लाने दय गए आंय।

¹⁶ परन्त जदि कोई बात बतकाओ करो चाए, तो बो जौ जान लैबे कि हमाई और न परमेसुर की मण्डली की ऐसी रीत आय।

¹⁷ परन्त जौ हुकम देत भए, मैं तुमाई बड़वाई नईं करत, ई लाने कि तुमाए संग्गै जुड़बे से भलो नईंयां, परन्त नुकसान होत आय।

¹⁸ कायसे कि पैले तो मैं जौ सुनत आंव, कि जब तुम मण्डली में जुड़त आव, तो तुमए बीचा फूट रैत आय और मैं कछु कछु सांची सोई मानत आंव।

¹⁹ कायसे तुम में दलबन्दी जरूर से हुईये, ई लाने कि जौन मान्स तुम में से सांचे कड़े, बे उजागर हो जाबें।

²⁰ सो तुम जौन एक जांगा जुड़त आव तो जौ पिरभु की बियारी करबे हां नोंई।

²¹ कायसे खाबे की बेरा, एक दूजे से पैले अपनी बियारी कर लेत आय, और कोऊ तो भूखो रैत आय, और कोऊ मतवारो हो जात आय।

²² का खाबे पीबे के लाने तुमाए घर नईंयां? या परमेसुर की मण्डली हां ओछो समजत आव, और जिन लौ नईंयां उन हां लज्जित करत आव? मैं तुम से का कओं? का ई बात में तुम औरन की बड़वाई करों? मैं बड़वाई नईं करत।

²³ कायसे कि जा बात मोय पिरभु से पोंची, और मैंने तुम हां पोंचा दई; कि पिरभु यीशु ने जौन रात बो पकड़वाओ गओ रोटी लई।

²⁴ और धन्नवाद करके रोटी तोड़ी, और कओ; कि जा मोरी देयां आय, जौन तुमाए लाने आय: मोरे सुमरन के लाने जौई करौ।

²⁵ ओई भांत से पिरभु ने बियारी के पाछें कटोरा सोई लओ, और कओ; जौ कटोरा मोरे रकत में नओ कौल आय: जब कभऊं पियो, तो मोरे सुमरन के लाने जौई करे करौ।

²⁶ कायसे जब कभऊं तुम जा रोटी खात, और ई कटोरा में से पियत आव, तो पिरभु की मौत हां जब लौ बो न आबै, परचार करत आव।

²⁷ ई लाने जौन कोऊ अपने आप को बिन जांचे परखे पिरभु की रोटी खाबै, या उनके कटोरा में से पीबे, बो पिरभु की देयां और रकत कौ अपराधी ठैर है।

²⁸ ई लाने मान्स अपने आप को जांच परख लेबे, और ऐई भांत से ई रोटी में से खाबै, और ई कटोरा में से पीबे।

²⁹ कायसे कि जौन खात पियत बेरा पिरभु की देयां हां न चीने, बो खाबे और पीबे से अपने ऊ परे दांड़ लात आय।

³⁰ ऐई काजें तुम में से बिलात जने कमजोर और रूगिया आंय, और बिलात जने मर सोई गए।

³¹ जदि हम अपने आप हां जांचते, तो दांड़ न पाते।

³² परन्त पिरभु हम हां दांड़ देके हुंसयार करत आय, कि संसार के संग्गै हम पे लांछन खोरी न आबै।

³³ ई लाने हे मोरे भईया हरौ, जब तुम खाबे के लाने इकट्ठे होत आव, तो एक दूजे के लाने ठैरे करो।

³⁴ जदि कोऊ भूखो होबे, तो अपने घर में खा लेबे, जीसे तुमाओ इकट्ठो होबो दांड़ कौ काज न होबे: बची कुची बातन हां मैं आके सुदार दै हों।