Titi 3 - U TIENU MAAMA TILI 2013

Titi yema Kilisiti Nitaanli nni 3 Li dandanli yua tagu n baa yaa tie maama

¹ Ŋan yaa tiadi ba, ban yaa fangi mi diema gobidikaaba leni li bali danba kuli, ki tuo ki yaa ŋua bi maama, ki go bogini tuonŋanli kuli po.

² Ban da maadi niloba kuli po mabiadima. Ban yaa bua mi yanduanma, ki yaa mani leni bi niba, ki pia mi dingima bi niba kuli kani.

³ Timoko den kpa tie yanluodanba, niyiekaaba leni bi niyaadikaaba. Ti gbanandi bonbuaka-biadila buoli kuli den die ti. Ti den pia ku tugutongu leni li nunponbiadili, ki tie lan pundi ban yaa nani yaaba, ki go nani ti lieba mo.

⁴ Ama U Tienu ti Candaano ŋanbili leni o buama bi niba po n den doagidi yaa yogunu,

⁵ o den faabi ti. Laa tie kelima ti den tieni yaa tuona n tiegi ka, ama li tie o ninñingbadima yaa po. O den faabi ti kelima mi maaliema yaa batisima leni U Tienu Fuoma Yua n guani ki pandi ti maama po.

⁶ U Tienu den teni ke ti Candaano Jesu Kilisiti yadi ti po o Fuoma yeni ke li kandi.

⁷ Lani, tinba yaaba n baa li moamoansaali kelima o ŋanbili po, baa baa yaa miali n kan gbeni, tin sugini ki baa yaali.

⁸ Laa maama tie mi madugikaama. N bua ŋan bangi ki go ñii li po bonŋanla, ke yaaba n daani U Tienu n yaa tiendi ania a tuonŋama tienma po. Lani n ŋani, ki go pia mi fuoma bi niba kuli po.

⁹ Ama ŋan loagidi li boofanli, yaajanba yela togida, a koana, yaa niama n tuugi leni li bali maama, kelima lani kuli naa pia fuoma, laa pia mayuli.

¹⁰ Yaa nilo n fiindi mi paadima, ŋan tundi o yenma, ki go pugini mi liema. Lani yaa pendi, ŋan paadi leni o,

¹¹ ki bani ke o sindi oba ki guani ki tiendi ti tuonbiadi, ki kuani o yuli ti buudi nni.

Mi majuodikaama

¹² N yaa soani Aritema yaa ka Tikika a kani, ŋan jaligi ki cua ki tuogi nni Nikopolisi dogu nni, kelima n jagi ke n baa yaa ye lankani ku fawaagu banlu kuli.

¹³ Ŋan moandi ki bogini li bali maama bando Sena leni Apolosi sancenli, ke liba n da poadi ba.

¹⁴ Li tie tiladi ke ti yaa yaaba moko n bandi ki yaa tiendi ania a tuonŋama tienma po. Yeni, bi baa fidi ki yaa baadi yaala n tie bi po tiladi. Lani, bi kan yaa tie nani yaa tibu n kaa luoni yeni.

¹⁵ Yaaba n ye ne leni nni kuli fuondi a. Ŋan fuondi ti danlinba li dandanli nni. U Tienu yaa ŋanbili n yaa ye leni yikuli.