Sofoni 3 - U TIENU MAAMA TILI 2013

Jerusalemi dogu fala leni u faabima 3 Jerusalemi yaaba yie kaa cengi U Tienu yiinu

¹ Fala n baa bi niyiekaaba dogu, Yuu n joagini ki pia ki mabinga yeni.

² Baa cengi o Diedo maama, Baa tuo o tundi. Baa bili bi dugidi o kani, Baa lingi U Tienu todima.

³ Bi yudanba tie nani yaa yangbanli N gaandi ki duni, Bi bujiaba tie nani yaa fuasangbanli N yen goadi ku ñiagu, Ki co li bonla ki ŋmani likuli Kaa baa sieni liba mi faama po.

⁴ U saawalipuaba tie japaadanba Leni jajanbidiniba. U kopadicianba joagini yaala n gagidi ki ŋani, Ki miidi o bali maama mo.

⁵ Ama o Diedo nan ye Jerusalemi, Ki tiendi yaala n tiegi, Kaa tiendi kuli yaala n bia. Fiifaama kuli, o ja yaa buudi n tiegi, Ki naa jidi ba dayenli. Ama ba leni lani kuli, Bi nibiadiba tiendi yaala n bia, Kaa gba fe li po.

⁶ O Diedo yedi: «N bolini i nilanbuoli boncianla, Ki mudi bi kaanpaali toadiefoaga. N teni ke oba kuli ki go tagi bi sani. N jugi bi dogi ki teni ke nilo ki go tagi likani, Ki bagi nilo n go yaa kaa likani.

⁷ N den tama ke li yaa puoli, N niba baa fangi nni ki tuo n tundi, Ke n kan bolini bi dogu. Ama likani yaaba pugini Ki tiendi yaala n bia bebe.

⁸ Li tie lani yaa po yo, Ke mini o Diedo yedi: ‹Yin guudi mani, Min baa cua yaa daali Ki waani yi ke yi nani. N jagi ke n baa taani i nibuoli kuli Leni mi diema niba kuli, Ki teni ke ban bandi n pabienli n bia maama, Kelima n pabienli mu baa buoni Ki tinga kuli.› »

U Tienu baa lebidi i nilanbuoli pala

⁹ O Diedo go yedi: «Lani, n baa lebidi i nilanbuoli niba maama Ki teni man tua maŋanma. Bi baa yaa ŋua mini Li Miali Diedo bebe Ki kpiagidi nni leni payenli.

¹⁰ Ba n niba yaaba n yadi Ki ban ye hali yaa kaani n foagi, Ki pendi Etiopi kpeni, Bani mo baa yaa kpendinni n po bu paabu.

¹¹ Lanyogunu, yinba n niba, Yi kan go jie i fe kelima yi tuona Leni yin tiendi n po yaa tuonbiadi yeni po. N baa ñani yi siiga yaa niba n pia ti japaadi boncianla. Yi japaadi baa baa u bianu n joagagidikaali po.

¹² N baa kubi yi siiga taliginba Leni bi yumiindanba, Yaaba n bili bi dugidi o Diedo kani, Ki baa yaa lingi bi wuonkaanu n kani.

¹³ Isidayeli yaaba, yaaba n baa sieni Kan go tieni kuli yaala n ki tiegi, Bi kan go pua faama, Janbi maama mo kan go yaa ye bi ñoana nni. Lani, bi baa fidi ki yaa di ki go goa bonŋanla, Ke oba kuli kan yagi bi yama mo.»

U Tienu baa guani ki ŋanbi Jerusalemi

¹⁴ Mangi mani yi pala, yinba Siyon yaaba! Yigini mani i pamandanyigimi, yinba Isidayeli yaaba! Mangi mani yi pala hali boncianla, Yinba Jerusalemi dogu yaaba!

¹⁵ O Diedo kagidi yi po wan den teni Ke yaa fala n ŋua yi, O deli ki yaani yi yibalinba. Wani o Diedo, yua n tie Isidayeli bado ye yi siiga, Yin da go jie ke falaba kuli baa ti cua.

¹⁶ Lanyogunu, bi baa yaa maadi Jerusalemi dogu nni ki tua: «Yin da jie mani! Siyon yaaba, yi gbani n da go wudi!

¹⁷ O Diedo yi Tienu ye yi siiga, Ki tie yaa jakoando n faabidi. O baa teni yin tua o pamanli bonla. O buama yi po teni ke o baa pa yi mi yepanma. O yiini ki kpaani leni li pamanli kelima yi po,

¹⁸ Nani mi jaanma daali yeni.» O Diedo yedi: «N baa paadi yi leni fala, Ki go paadi yi leni yaa fe n den ŋua yi.

¹⁹ Diidi, lanyogunu n baa faligi yaaba n den mabindi yi. N baa faabi n niba, Yaaba n ki den baadi todima nani yaa pe n duugi yeni. N baa guani ki kpeninni ban Den gedini n niba yaaba ti yonbidi, N baa teni ban guani ki baa Ti kpiagidi, bi yela mo n ña, Ban den laa i fe naankani kuli.

²⁰ Lanyogunu n baa guani ki kpeninni yi. Li baa yaa tie min baa guani Ki taani yi yaa yogunu. Yi baa le ke n lebidi yi yema, Ki teni yin guani ki baa yi kpiagidi, Yi yela mo n ña li ŋandunli nibuoli nni kuli.» Mini o Diedo n yedi yeni.