Sofoni 2 - U TIENU MAAMA TILI 2013

U Tienu maadi leni bi yumiindanba

¹ Taani mani, taani mani, Yinba yaa niba n ki gba fe yeni.

² Tieni mani yeni, Hali ki daa tua nani u faalu N figi ki yadi yaa muafenma yeni. Tieni mani yeni, Hali ke o Diedo pabienli, Yaali n nani u mu yeni Daa nandi yi, Hali ke o pali n baa fii yi po Yaa daali yeni daa pundi.

³ Yinba, ki tinga yumiindanba kuli, Lingi mani o Diedo, Yinba yaaba n tuo ki baa yaa ŋua O ñoamabonbilikaana! Yaa cuoni mani leni mi teginma, Yaa cuoni mani leni li yumiinli, Wani U Tienu nintuali. Li fidi ke yi baa ciadi, O Diedo pabienli daali.

O saawalibiado 2.4-15 U Tienu fu leni yaa nibuoli n ye nintuali

⁴ Bi niba baa bodi Gasa dogu nni, Asikalon yaaba baa bodi, Yibalinba baa deli ki ñani Asidodi yaaba Bi dogu nni yensiicocole. Bi baa deli ki ñani Ekron yaaba moko bi dogu nni.

⁵ Fala n baa yi, Yinba yaaba n tie Kafitori yaaba, Ki ye mi ñincianma balinma. U Tienu jagi ki bili yi po yaa buudi n tie ne ki yedi: «Yinba Kanana yaaba, Yaaba n ye Filisiti yaaba dogi nni, N baa bolini yi ke ba niyendo kan sieni.

⁶ Yi diema yaama n ye Mi ñincianma balinma yeni baa tua yankpaafuali, Bi yankpaaba n baa yaa kpaa bi yandi naani. Mi baa tua ban baa yaa pua A yanlola naani i yankuli po.

⁷ Juda niba yaaba n sieni baa Diedi laa kaanu, Bi baa yaa kpaa bi yandi lankani. Ku juogu yaa yen baa mo, Bi baa n duani Asikalon dogu diena nni, Kelima o Diedo bi Tienu baa guani ki ŋanbi bi yema.»

U Tienu fu leni puoli nibuoli

⁸ O Diedo yedi: «N gbadi Moabi diema yaaba n sugidi N niba yaa sugidi, Leni Anmoni buolu mo n maadi Yaa japaamaama, ki yuandi n niba. Bi fie n niba diema ki pugini bi yaama.

⁹ Li tie lani yaa po yo ke mini, Li Miali Diedo U Paaciamu Kuli Daano, Isidayeli Tienu yua n fo poli ki yedi: ‹Moabi yaaba leni Anmoni dogi baa bodi Nani Sodomi leni Gomori dogi yeni. Ti konkondi baa fii ki luoni bi diema nni, Likani baa tua tinyaama, Likani baa tua paboanli kaanu Hali yaa yogunu kuli po. N niba yaaba n ciadi baa cua Ki fagi bi diema piama, Ki fie bi diema mo.› »

¹⁰ Laa bonla baa baa ba kelima bi japaadi po Leni ban den fiagi Li Miali Diedo, U Paaciamu Kuli Daano niba maama po.

¹¹ O Diedo baa cie bi jigi, Kelima o baa bolini bi nisaaliba n jigini yaala kuli. Lani, ba yaa nibuoli n ye hali foagima baa gbaani Ki kpiagi o bi diema nni.

U Tienu fu leni Etiopi leni Asiiri yaaba

¹² O Diedo yedi: «Yinba Etiopi yaaba, N baa teni yi yibalinba n kpa yi Leni mu jugisiemu.»

¹³ O baa fii ki sedi nujienu yaaba po, Ki bolini Asiiri diema yaaba, Ki teni bi dociamu Ninivi n tua paboanli kaanu Leni fanpienma, ñima n ki ye naani.

¹⁴ Likani baa tua denyandi leni Ti fuayandi buoli kuli n baa yaa ye naani. A juuna leni a guda n baa yaa ye likani diejendi nni, Ki cigindi ki mua a diebona kani. I nuani baa yaa jagi a diebona kani ki mua, U dogu kuli li baa yaa tie diegbendi bebe. Bi ŋabi ban den maa a diena Leni sediri daadi yaadi yeni.

¹⁵ Lani n tie yaala n baa baa laa dogu yaaba, Bani yaaba n den pia ti japaadi ki jigini bi fidiceli, Ki tama ke liba kuli kan baa ba, ke baa pia kuli bilie. Diidi likani n tua paboanli kaanu maama! Likani tua ti yandi wuonkaanu! Yaaba n tagi likani kuli fuoni ki fegini bi yula.