Sofoni 1 - U TIENU MAAMA TILI 2013

O Diedo bujiali daali 1.1—2.3

¹ Mi naa maama tie o Diedo n den yedi Sofoni yaama, Anmoni bijua Josiasi n den tie Juda bado yaa yogunu. Sofoni den tie Kusi bijua, Kusi n yaa tie Gedalia bijua, Gedalia n yaa tie Amaria bijua, Amaria mo n yaa tie Esekiasi bijua.

U Tienu baa faligi ki tinga niba kuli

² O Diedo den yedi: «N baa bolini yaala n ye Mi tinfanma po ki fo kuli.

³ N baa duuni ki ñani bi niba leni ti yandi, Ki kpa ti bonyugiditi leni i jami, Ki tudi ki lu bi nibiadiba leni bi tuonjoagima, Ki bolini bi niba kuli mi tinfanma po.» Mini o Diedo n yedi yeni.

U Tienu baa jia Juda leni Jerusalemi yaaba buudi

⁴ O Diedo yedi: «N baa fii ki sedi Juda Leni Jerusalemi yaaba po. N baa ñani likani yaa bonla n sieni Ki tie o bulo Baali yaala kuli. Ba yaa kopadicianba n den tuuni o po, Niloba kuli kan go tiadi bi po.

⁵ N baa bolini yaaba n do A diena tanpoli ki kpiagidi a ŋmabila Leni yaaba n gbaandi ki kpiagidi nni, Ama ki nan biliti i ñoaniani leni o bulo Milikom.

⁶ N baa bolini yaaba n lebidi ki ŋaa mini o Diedo, Kaa lingi n todima leni n tundi.»

O Diedo pabienli daali

⁷ Cuo mani yi ñoana o Diedo U Tienu nintuali, Kelima o pabienli daali nagini. O bogini li padili ki gagidi ki ŋanbi wan yini yaaba.

⁸ O Diedo yedi: «Min baa teni n niba yibalinba n kpa ba yaa daali, N baa fii ki sedi a koanbala leni badidiegu yaaba po, Ki faligi yaaba n ŋua i nilanbuoli maasuagu.

⁹ Landaali, n baa faligi yaaba n yugi ki kandi li budieli buliñoakoali. N baa faligi yaaba n gbiendi bi budiena leni ban janbidi ki fenli yaala.»

¹⁰ O Diedo yedi: «Landaali, a bubula baa fii ki loli “I jami buliñoabu” kani. I kuudi baa fii ki loli u dogu ñianpanli po. Jerusalemi juana po, a diena baa Yaa baali leni ku fuciangu.

¹¹ Yinba Makiteki ñianjaali yaaba mua mani, Kelima a kpenda kuli baa kpe, Yi ŋanjilifa biigida mo kuli baa bodi.

¹² Landaali, n baa gaani Jerusalemi nni kuli leni mu fidisanmu, Ki lingi ki faligi yaa niba n dua ki fuo ki maadi bi pala nni, Ki tua: ‹O Diedo kan fidi ki tieni yaala n ŋani bi yaala n bia.›

¹³ Ama bi yibalinba baa tugi bi piama, Ki bolini bi diedi mo. Bi maa ti diedi ki nan kan kua lienni, Ki ŋuu duven tiidi ki nan kan ño li daama.»

¹⁴ O Diedo pabienli dacianli yeni nagini, Li nagini ki gbeni, li jaligi ki pundi. Landaali baa yaa tie moe bebe, Ba a jakoanda baa mua ki liini mi todima.

¹⁵ Landaali baa yaa tie pabienli daali, Fala leni ti yanyagiciandi daali, Li tingbali leni mi bolinma daali. Li baa yaa tie ciñuuli leni biigili daali, A tawala leni ku gbangbadigu daali.

¹⁶ Landaali, bi toatieba baa piebi a naatuntuna, Ki kuudi bu toabu kuudi ki baa i kaanpaali leni a toadiefoaga.

¹⁷ O Diedo yedi: «N baa kuani bi nisaaliba fala nni, Ki teni ban yaa cuoni ki tulibi nani a juama yeni, Kelima bi tieni o Diedo po ti tuonbiadi. Bi soama baa wuli i kaani kuli nani ku tangungu yeni, Bi gbanandi mo n bedi nani ti baadi yeni.

¹⁸ O Diedo pabienli daali, Bi ŋanjilifa leni bi wula kan fidi ki faabi ba. O Diedo pabienli mu baa buoni ki tinga kuli, Li baa yaa bia hali boncianla. O baa bolini ki tinga niba kuli.»