Sakari 7 - U TIENU MAAMA TILI 2013

Yaa ñoalolima n tiadi Jerusalemi bodima

¹ O bado Dariyusi bali binnaali, o Diedo den maadi leni nni. Li den tie ciyia ban yi yaa ŋmaalo Kisile danaali.

² Beteli yaaba den soani Saletiseli leni Legemi-Meleki leni nitoaba ke ban gedi o Diedo diegu nni, ki ban jaandi ki mia o Diedo seli

³ ki go buali Li Miali Diedo diegu kopadicianba leni bi saawalipuaba yaa buali n tie ne: «Naani cimuu ŋmaalo yaa ñani, ti go yen baa mua, ki go loli bu ñoabu, nani tin den tiendi maama hali yogu?»

⁴ Li Miali Diedo U Paalu Kuli Daano den maadi leni nni, ki yedi

⁵ ke min waani mi diema niba kuli leni bi kopadicianba yaa maama n tie ne: «Yi den luo bu ñoabu ki go buudi cimuu leni cilele ŋmaali nni, hali bina piilele. Ama naani, moamoani, yi den luo laa ñoalolima mini yaa po yo?

⁶ Yin den di ki go ñu yeni, laa den tie yi yula po ka?»

⁷ Naani mii den kpa soani n saawalipuaba hali yogu, ke bi waani laa maama ka? Laa yogunu, Jerusalemi dogu leni u dobila da den kaa leni mi yanduanma, ke nuganu po diema leni Sefela mo da pia bi niba.

⁸ O Diedo den maadi leni nni ki yedi yaa maama n tie ne:

⁹ «Mini Li Miali Diedo U Paalu Kuli Daano den yedi: ‹Yaa ja mani ti buudi leni mi teginma, ki go yaa pia yiyaba po mi ŋanma leni mi ninñingbadima.

¹⁰ Yin da mabindi a kpepuona, a kpienbila, bi canba leni a tadima. Yin da kpaagi yiyaba po yaala n bia.›

¹¹ Ama bi niba den yie kaa cengi. Bi buli bi nunmu, ki biini bi tuba kaa bua ki gbadi.

¹² Bi den juagi bi pala nani diama tanli yeni. Baa den cengi mini Li Miali Diedo U Paalu Kuli Daano bali maama leni min den kpa soani n saawalipuaba ke bi maadi n maama yaama leni n Fuoma. Lani, n pali den fii boncianla,

¹³ ke n yedi: ‹Min den yini ba ke baa tuo yeni, n moko yie kaa guani ba, ban den yi nni ke mia nni mi todima yaa yogunu.

¹⁴ N den teni ke bi yadi ba ban kaa den bani yaa nilanba siiga. Ban den gedi ki ŋaa mi diema, mi den tua diegbena, nilo n kaa go den tagi naani. Laa dieŋanma den tua fanpienma ke nilo ki go ye mi niinni.› »