Sakari 6 - U TIENU MAAMA TILI 2013

Li bonlekaniila: toatelitinaa

¹ N go den laa bonlekatoala. N den laa toatelitinaa, ke ti ñani kumoanjuanalie siiga.

² Yaa taami n den dia yaa toateligu n ye liiga, den tie tanmoani. Yaaba n den dia ku bonliegu mo den tie tanboani.

³ Yaaba n den dia ku bontaagu mo den tie tanpieni. Yaaba n den dia ku bonnaagu mo den moani ki bua ki yaa boani, ki tuu tuu.

⁴ N den buali maleki yua n den maadi leni nni yeni: «Bine mo tie be, n Diedo?»

⁵ O den guani ki yedi nni: «Li tie tanpoli tafaali boninaa, yi n ñani i kaanu kani, yin bi ye naani, ki tinga kuli Diedo kani.»

⁶ Yaa tanboani n den dia toateliyengu den teli nujienu po yaa diema. I tanpieni moko den ŋoadi i tanboani yeni fuuli. I tantuuni tuuni mo den teli ganu po.

⁷ I tanmoani mo den ñani ki mia ke bi bua ki gedi ki ban goandi ki tinga. Maleki den yedi ba: «Gedi mani ki ban goandi ki tinga.» Bi den gedi ki ban goandi ka.

⁸ O den yini nni ki yedi: «Ŋan nua ke yaaba n teli nujienu po diema yeni, bi bua ki ban jiini n Fuoma laa diema yaaba po yo.»

Josue kpiagidi saawalo

⁹ O Diedo den maadi leni nni, ki yedi yaa maama n tie ne:

¹⁰ «Ŋan gaa yaaba n ye ti yonbidi n teni Helidayi, Tobiya leni Yedaya yaa paabu ke bi cuani yeni. Bani yaaba n cuani yeni, den cani Sofoni bijua, Josiasi denpo, ban den ñani Babilonni ki cua. Dinla dinla, ŋan fii ki gedi lipo.

¹¹ Ŋan taa ŋanjilifa leni wula, ki duadi ki tieni ki badifogiliga ki cibini Yehotisadaki bijua bi kopadicianba bado Josue.

¹² Ŋan yedi ke Li Miali Diedo U Paalu Kuli Daano yedi ke joa baa cua, ki yi li “Benkpeli.” O baa kpeli wan ye naani, ki maa o Diedo diegu.

¹³ O baa yaa pia li bali maalima, ki kaa o gbandi po, ki die. O kopadiciamo baa yaa ye o kani, ke bikuli taa ñoabu ki tuuni.

¹⁴ Ki badifogiliga baa yaa ye mini o Diedo diegu nni, ki tie yaala n tiadi Helidayi, Tobiya leni Yedaya leni Sofoni bijua, Josiasi yema.»

¹⁵ Bi niba baa ña hali foagima, ki cua ki todi ban guani, ki maa o Diedo diegu. Lani, yi baa bandi ke Li Miali Diedo U Paalu Kuli Daano n soani nni yi kani moamoani. Laa bonla kuli baa tieni, yi yaa tuo ki ŋua o Diedo, yi Tienu.