Sakari 3 - U TIENU MAAMA TILI 2013

Li bonlekanaala: bi kopadicianba bado Josue

¹ O Diedo den teni ke n laa bi kopadicianba bado Josue, ke o se o Diedo maleki nintuali. Sutaani den se Josue jienu po, ki bua ki kuli o.

² Maleki yeni den yedi Sutaani: «O Diedo n yie a po! O Diedo, wani yua n gandi Jerusalemi yeni, n yie a po! Naani Josue ki tie nani ban kuudi ki ñani yaa mudatali u mu nni yeni ka?»

³ Josue den la tiajoaginde ki se Maleki nintuali.

⁴ Maleki yeni den yedi o yegininlieba, ke ban landi o tiajoagindi yeni. Li yaa puoli, o den yedi Josue: «Diidi, n ñani a po a tagili, ki baa lani a ti jaantiadi.»

⁵ O go den yedi: «Fini mani o yuli yaa finfinjuadi n ŋani.» Bi den fini o yuli yaa finfinjuadi n ŋani, ki go yieni o ti tiayiekaadi. O Diedo Maleki den se likani.

⁶ Maleki yeni den yedi Josue ke

⁷ Li Miali Diedo U Paalu Kuli Daano niani yaa ñoanianu n tie ne ki yedi: «A yaa tuo ki cuoni n sani nni, ki kubi n bali maama, n baa piani fine n diegu leni ku luoli. N baa pa ŋa u sanu ŋan nagini n kani nani yaa malekinba n ye n nintuali ne.

⁸ Lanwani, Josue, fini bi kopadicianba bado, ŋan cengi, fini leni yaa kopadicianba n yegi leni a, yinba yaaba n tie yaa faabima n kpendi maalima. N baa teni n naacemo, yua n yi li Benkpeli yeni n cua.

⁹ N bili Josue nintuali li tanli, yaali n pia nunilele. N baa diani li po dianu ki ñani mi naa diema tuonbiadi dayenli dayenli. Li Miali Diedo U Paaciamu Kuli Daano n yedi yeni.

¹⁰ Landaali yaa pundi, yi siiga yuakuli baa yini o lieba yi duventiidi leni yi kankanŋuuke tinga, ban mangi bi pala mi yanduanma po.»