Sakari 2 - U TIENU MAAMA TILI 2013

Li bonlekaliela: a yina leni bi maaba

¹ Li bonlekaala nni, n den laa yinanaa.

² N den buali maleki yua n maadi leni nni yeni: «Yaa yina n tie ne mo bundi be?» O den guani ki yedi nni: «Laa yinnaada tie yaa nilanbuoli n den pia u paalu, ki fidi ki yadi Juda leni Isidayeli diema yaaba leni Jerusalemi dogu yaaba.»

³ Li yaa puoli, o Diedo den waani nni maabinaa.

⁴ N den buali o: «Bi cua ki tiendi be?» O den guani ki yedi: «Bi cua ki baa jieni ki go bolini yaa nilanbuoli n den fii ki sedi ki yadi Juda diema yaaba, hali maama ke ba niyendo ki den ye yua n baa fidi ki mua jama.»

Li bonlekataala: u baabibiigiko

⁵ Li bonlekaala nni, n den laa joa ke o se ki kubi u baabibiigiko.

⁶ N den buali o: «A caa le?» O den guani ki yedi nni ke o caa ki baa n biigi Jerusalemi dogu foaginu leni u pianu.

⁷ Lane, Maleki yua n den maadi leni nni yeni, den cuoni ki cuubi malekitoa ke omo cuoni ki togidi o.

⁸ O den yedi o: «Sani ki yedi o jawaalo yua n kubi u baabibiigiko yeni, ke bi kan maa bilini ki lindi Jerusalemi, kelima yaa niba leni yaa yandi n baa yaa ye lienni yeni baa yaa yabi boncianla.»

⁹ O Diedo yedi: «Mini n ba baa yaa ye likani, ki doagidi n kpiagidi, ki teni n fantama n lindi ki cebini u dogu yeni, nani u bilinu yeni.»

U Tienu maadi leni yaaba n ye ti yonbidi

¹⁰ O Diedo yedi o niba: «Min den yadi yinba yaaba i kaani kuli yeni, Sani mani moala, Sani ki ña mani nujienu po diema.

¹¹ Yinba Jerusalemi yaaba, Ban den gedini yinba yaaba Ti yonbidi Babilonni yeni, sani mani ki ña lipo.»

¹² Li Miali Diedo U Paalu Kuli Daano, Yua n soani nni leni o bali paalu, Maadi yaa nilanbuoli n den fagi yi yeni po, Ki yedi ke yua n sii yi kuli, Tuu wani U Tienu nunbu nne.

¹³ O yedi: «N baa fii i nilanbuoli yeni po, Ki teni ban den cuo yaaba yeni mo N fagi bi yaa piama.» Laa bonla yaa tieni, Yi baa bandi ke Li Miali Diedo, U Paaciamu Kuli Daano n soani nni moamoani.

¹⁴ O Diedo yedi: «Yiini mani ki mangi yi pala, Yinba Jerusalemi yaaba, Kelima n kpendi ki baa yaa ye yi siiga.

¹⁵ Lanyogunu i nilanbuoli boncianla Baa sani ki tabini mini Li Miali Diedo, Ki tua n niba. N baa yaa ye yi siiga.» Lani kuli yaa tieni, yi baa bandi Ke o Diedo U Paalu Kuli Daano N soani nni yi kani.

¹⁶ O Diedo baa guani ki diedi Juda diema, Man tua o yaama cele, Wan den gagidi ki ŋanbi Yaa tinga yeni yaa niinni. O baa guani ki gandi Jerusalemi dogu, Wun tua o dogu.

¹⁷ Yuakuli n cuo o ñoabu o Diedo nintuali, Kelima o baa fii ki ña o yekaanu Yuu n gagidi ki ŋani yaa niinni.