Sakari 14 - U TIENU MAAMA TILI 2013

U Tienu pabienli daali

¹ O Diedo pabienli daali nagini. Yinba Jerusalemi yaaba, Yi yibalinba baa yaa boagidi yi piama Yi nunbu nni.

² O Diedo baa taani i nilanbuoli, Ki teni ban baa Jerusalemi. Bi baa fie u dogu, Ki fagi yaala n ye a diena nni kuli. Bi baa ñii yi puoba leni u paalu. Bi baa cuo u dogu niba boagidima Ki gedini ti yonbidi. Ama yaa niba n sieni Baa yaa kaa u dogu nni.

³ Li yaa puoli, o Diedo baa fii I nilanbuoli yeni po, Ki pua ki paadi ba, Nani wan den kpa tieni maama Mi janjanma leni bu toabu daali yeni.

⁴ Lanyogunu, o baa sedi Olivie Tiidi juali po, Ki tiegi Jerusalemi dogu puoli. Li juali yeni baa pudi ki yagidi, Ki tiegi puoli leni nintuali, Ki ŋaa joaloanciangu siiga nni. Bonyagiyenli baa yaa ye Nujienu, line mo nuganu po.

⁵ Yi baa tagini ku joaloangu yaagu N ye a juana siiga yeni, Ki sani ki cia, Kelima ku joaloangu yeni baa tandi Ki pundi hali Atisali. Yi baa sani nani yi yaajanba N den sani maama, Juda bado, Osiasi yogunu, Mi tindigibima n den tieni yaa yogunu yeni. Lanwani, o Diedo, n Tienu Baa yegi leni o malekinba ki cua.

⁶ Landaali, yenma kan yaa ye. Ti wadi baa kpandi ki tua Nani a tatana yeni.

⁷ Laa yogunu baa yaa ye uba yo, O Diedo bebe n bani u. Ku ñiagu leni u yensiinu kan yaa pia paadima, Kelima ba ku yenjuagu, li baa yaa yieni.

⁸ Landaali li miali ñinbunli baa pudi Jerusalemi, Mi ñima yeni boagidima baa yaa puubi, Ki ban koa yaa ñincianma n ye puoli, Yaa boagidima n sieni mo, Yaa ñincianma n ye nintuali. Li baa yaa tie yene ku siagu leni li fali kuli.

⁹ Landaali, o Diedo baa yaa tie Ŋanduna kuli bado, Bi niba kuli baa yaa kpiagidi o, Bikuli baa yaa taagi o yeli.

¹⁰ Mi diema kuli baa tua Nani Araba tialu yeni. Ki cili nujienu po dogu Geba, Ki ban pundi hali ganu po dogu Rimon. Jerusalemi dogu baa yaa ye u kaanu, Ki ye naani n kpedi. U baa tandi, ki cili bani Benjamen buolu Yaaba buliñoabu kani, Ki ban tuoni hali bu buliñoakpelibu, Ki bonlogidiga buliñoabu kani. U go baa tandi, ki cili hali Hananeeli diefoagili kani, Ki ban tuoni hali o bado duven Datuodikaanu kani.

¹¹ Bi niba baa yaa kaa u dogu nni, Ke bolinma kuli ki go ŋua u. Jerusalemi dogu baa yaa ye leni mi yanduanma.

¹² O Diedo n baa teni yaa bonbiadila N baa yaa nilanbuoli n baa fii ki tieni Jerusalemi yaaba bu toabu tie line: Bi gbanandi baa bedi ke bi da fo. Bi nuni baa bedi bi nunbuodi nni, Bi landi mo n bedi bi ñoana nni.

¹³ Landaali, o Diedo baa teni Ti jawaanciandi n cuo ba. Bi baa jili ki cuo biyaba bi ŋmiali nni, Yuakuli baa koani leni o lielo.

¹⁴ Juda yaaba baa koani ki gaa Jerusalemi dogu, Bi baa fie yaa nilanbuoli n lindi ba Piama kuli. Bi baa wodi wula, ŋanjilifa Leni ti tiayiekaadi hali boncianla.

¹⁵ Yaa bonbiadila n baa bi niba yeni, Baa cuo i taami, i buomi, Ti yuoyuodi, i ŋunbi leni yaa yandi n ye I nilanbuoli yeni toanaga nni kuli.

¹⁶ Li baa baa yaa niba n baa ciadi I nilanbuoli yii n den cua ki baa Jerusalemi yeni siiga. Laa niba baa yaa kpendi binli kuli Laa dogu nni ki kpiagidi o bado, Li Miali Diedo U Paaciamu Kuli Daano, Ki go jaani a suga jaanma.

¹⁷ Lanwani, li yaa tie ke ki tinga Nilanbuoli siiga, nilanbuoluba yie, Kaa kpendi Jerusalemi ki baa yaa kpiagidi o Diedo U Paaciamu Daano, Taaga kan mi laa niba diema nni.

¹⁸ Ejipiti yaaba yaa yie ki kan gedi Jerusalemi ki ban jaani a suga jaanma, O Diedo n baa soani yaa bonbiadila Yaa nilanbuoli n yie yeni siiga, Baa cuo bani, Ejipiti yaaba moko.

¹⁹ Lani n tie yaa bonbiadila n baa cuo Ejipiti yaaba leni yaa nilanbuoli n baa yie ke bi kan gedi laa jaanma.

²⁰ Landaali, bi baa diani yaa coolonmu n juani I taami tuli nni po: “Bi gagidi la o Diedo po.” O Diedo diegu boba baa gagidi ki yaa ŋani, Nani yaa tadimu n se li padibinbinli kani, Ke bi yen tiendi lienni mi soama ki miini yeni.

²¹ Yaa boba n ye Jerusalemi leni Juda kuli, Bi baa gagidi a Li Miali Diedo, U Paaciamu Kuli Daano po. Yaaba n baa yaa kpendi ki padi, Baa yaa taani laa boba yo ki ŋaandi ti padinandi. Landaali yaa pundi, Kpendo kuli kan go yaa ye Li Miali Diedo, U Paaciamu Kuli Daano diegu nni.