Sakari 13 - U TIENU MAAMA TILI 2013

¹ Li Miali Diedo U Paaciamu Kuli Daano yedi: «Landaali, li ñinbunli baa pudi, ki yaa ŋuudi ki ñandi Davidi puoliŋuani leni Jerusalemi yaaba Tuonbiadi leni bi joagindi.

I buli leni bi saawalipua-faadanba baa bodi

² Landaali, n baa bolini i buli mi diema nni, ke oba kuli kan go tiadi ba bi yela. N baa bolini yaaba n pua mi faama ke bi tie saawalipuaba leni bi yantiajoagindi.

³ Li yaa tie ke nilo go pua saawali, o baamado leni o naamado baa yedi o: ‹Li pundi ŋan kpe, kelima a maadi ki pua mi faama, ki nan yedi ke o Diedo n soani a.› Lanwani o baa leni o naa, bani yaaba n mali o yeni baa muu ki kpa o, wan pua mi saawalifaama yaa yogunu.

⁴ Landaali, i fe baa cuo yaaba n pua saawali ke bi kan go pua. Bi kan go togidi bi bonlekaala mo. Bi kan go la bi saawalipuaba liada ya n tie gbandi, ki pia ti kobidi yeni, ki yaa boandi bi niba.

⁵ Bi siiga, yuakuli baa yedi: ‹Mii tie saawalipualo ka, n tie kpakpaale, ki ko bu kpaabu hali n bonwaama nni.›

⁶ Ama bi baa buali o: ‹Be yaa nala n nan ye a benli po yeni?› O baa guani ki yedi: ‹Bi den pua nni n danlinba dene.› »

U Tienu niba baa guani ki tuo o

⁷ Li Miali Diedo U Paaciamu Kuli Daano yedi: «Ki jugisiega, fii ki baa o yankpaalo, Min den taa yua ke o tie n todika yeni. Ŋan kpa o, lani i pe baa yadi i kaani kuli, Min baa ki cuo a bonbila.»

⁸ O go den yedi: «N baa boagidi n niba cagataa, Ki bolini cagalie. Cagiyenli bebe n baa sieni.

⁹ N baa ŋaani bani yaaba n sieni ki fo yeni, Nani ban yen puli ŋanjilifa leni wula U mu nni maama, Ki ñani ti joagindi yeni. Bi baa yaa jaandi ki miadi nni, N baa yaa gaani bi miabu. N baa yedi: ‹Bine n tie n niba.› Bimo n yedi: ‹Li Miali Diedo tie ti Tienu.› »