Sakari 12 - U TIENU MAAMA TILI 2013

Jerusalemi faabima

¹ O Diedo n yedi yaala Isidayeli yaaba po, Wani yua n tagi tanpoli, Ki go bili ki tinga tanpuuna, Wani yua n puni o nisaalo li miali yedi:

² «N baa teni Jerusalemi yaaba n tua nani yaa tadiñokaaga n gbie leni yaa duven n tie n pabienli. Yaa nilanbuoli n lindi ba baa ño laa duven bi nunmu n fuuni. Li baa tua yene Juda yaaba moko yaa po, yibalinba n lindi ki cebini ki baa Jerusalemi yaa yogunu.

³ Lanyogunu, n baa teni Jerusalemi yaaba n tua i nilanbuoli po tankpiagili. Yaaba n baa bua ki yua li kuli baa poagili bi yula boncianla. Ki tinga nibuoli kuli baa taani ki fii ki sedi li po.

⁴ Lanyogunu, n baa teni ti jawaandi n cuo i taami kuli, i jeje mo n cuo yaaba n jagi ba. N baa yaa faami Juda yaaba po. Ama n baa juani i nilanbuoli taami. Mini o Diedo n yedi yeni.

⁵ Juda badiba baa yedi bi yama nni: ‹Jerusalemi yaaba paalu ña Li Miali Diedo, bi Tienu U Paalu Kuli Daano kane.›

⁶ Lanyogunu, n baa teni Juda yudanba n tua nani ku moasiangu yeni li fuali nni, yaa ka nani u mukaanu ŋalikama baba nni yeni. I kaani kuli, bi baa bolini yaa nilanbuoli n kaa ki lindi ba. Jerusalemi yaaba baa yaa li ye bi kaanu, Jerusalemi yene.

⁷ O Diedo baa kpa faabi Juda diedi yaaba, yeni Davidi puoliŋuani leni Jerusalemi yaaba kan mangi bi pala, ki cie Juda yaaba, yaaba n sieni.

⁸ Lanyogunu n baa kubi Jerusalemi yaaba, ba bi siiga yua n tadi ki cie baa yaa pia u fidu nani Davidi yeni. Davidi puoliŋuani baa yaa tie nani U Tienu yeni, nani o Diedo maleki yua n ye bi liiga yeni.

⁹ Lanyogunu, n baa bolini yaaba N baa fii ki sedi Jerusalemi yaaba po kuli.»

Li paboanli mi diema nni kuli

¹⁰ U Tienu go yedi: «N baa gbieni Davidi puoliŋuani leni Jerusalemi yaaba, yaaba n sieni, mi ninñima leni bu miabu yaa yantiali. Bi baa pegidi ki diidi mini, ban den muu mini yua yeni. Li paboanli baa cuo ba, nani bonjayenyenga kuuma yaa paboanli yeni. Bi baa mua boncianla, bi baa mua hali boncianla nani o nilo bijakpelo kuuma yeni.

¹¹ Lanyogunu, li paboanli baa yaa yabi Jerusalemi, nani ban yen biidi bi pala Megido joaloangu nni yaa bulo Hadadi-Rimoni kuuma po maama yeni.

¹² Li paboanli baa yaa ye mi diema nni kuli. Buolu kuli niba baa paadi ki baa Bi kaanu ki biidi bi pala. Davidi puoliŋuani siiga, Bi jaba baa baa bi yaa kaanu, Bi puoba mo bi yaa yuu. Natan puoliŋuani siiga, Bi jaba baa baa bi yaa kaanu, Bi puoba mo bi yaa yuu.

¹³ Levi buolu nni, Bi jaba baa baa bi yaa kaanu, Bi puoba mo bi yaa yuu. Simeyi puoliŋuani siiga, Bi jaba baa baa bi yaa kaanu, Bi puoba mo bi yaa yuu.

¹⁴ Yaa buoli n sieni kuli, Bi jaba baa baa bi yaa kaanu, Bi puoba mo bi yaa yuu.»