Sakari 11 - U TIENU MAAMA TILI 2013

U Tienu baa bolini yaa diema n pia u paalu

¹ Liban yaaba, luodi mani yi buliñoana, U mu n baa ki je yi sediri tiidi.

² Yinba sipre tiidi, yaa mua mani, Kelima sediri tiidi baa. Laa tiŋandi bodi. Yinba seni tiidi, yii n ye Basan, mua mani, Kelima ban den wuondi yaa fuali n den biigi Jurden kpenu balinma yeni bodi.

³ Bi gobidikaaba buudi, Kelima bi kpiagidi gbeni. I yangbanli duni, Kelima yaa fuali n den baali Jurden kpenu Ke bi wuonkaani ye lienni yeni bodi.

Bi yankpaaliediba

⁴ O Diedo, n Tienu den yedi nni: «Yaa kpaa ban caani yaa pe u yankodikaanu po.

⁵ Yaaba n daa ba yen kodi ba kaa nua kuli tagili. Yaaba n kuadi ba mo tua ke ban tuondi o Diedo kelima bi baa mi piama. Ba bi yankpaaba mo yaa siiga, oba kuli ki gba bi po ninñima.

⁶ N kan go gbadi ninñima ki tinga niba po, n baa teni bi ŋmiali nni, yuakuli n soani o lielo wan fidi maama. N baa ŋaa bi badiba moko n soani ban fidi maama. Bi badiba yeni baa bolini ki tinga niba, nmo kan faabi ba bi nuu nni. Mini o Diedo n yedi yeni.»

⁷ Lanwani, n den kpaa ban den caani yaa pe u yankodikaanu po. N den baa yankpaagbiamilie. U gbayendu den yi “Danligu,” u gbalielu mo “Taanyenma.” N den kpaa i pe yeni.

⁸ Ŋmayendo nni, n den cabi i pe yeni yankpaataadiba. Mii den fidi ki juuni leni ba, bani mo den miadi nni.

⁹ Lanwani, n den yedi i pe yeni: «N kan go kpaa yi. Yua n baa kpe wan kpe. Yua n baa bodi, wan bodi. Yaa pe n sieni mo yaa fidi, ban ŋmani biyaba.»

¹⁰ N den taa n yankpaagbiamu yuu n yi “Danligu” yeni, ki kua ki biidi U Tienu n den kuani yaa ŋantaado leni bi niba kuli.

¹¹ Ku ŋantaado yeni den biidi lanyogu lanyogu. A yankpenda, yaaba n den kpaagi nni den bandi ke n bontienkaala kuli tie o Diedo n yedi yaale.

¹² N den yedi ba: «Yi yaa sua ke li dagidi, yin pa nni n panpaani. Yi yaa sua ke laa dagidi yin pa nni n cii mo, yin cedi. Lanwani, bi den coadi kujapiena piitaa ki teni nni.»

¹³ O Diedo den yedi nni: «Bi sua ke mii cie laa dunga. Taa laa ligiciami ki ban teni o maano o Diedo diegu nni.» Lanwani n den taa i ligi yeni ki gedi ki ban teni o maano.

¹⁴ Li yaa puoli, n den kua n yankpaagbiamu yuu n yi “Taanyenma” yeni, ki biidi Juda yaaba leni Isidayeli yaaba taanyenma.

¹⁵ O Diedo go den yedi nni: «Taa ku yankpaayuogu yaa tiadi,

¹⁶ kelima n baa cuani mi diema po, yaa yankpaalo n kan yagi o yama yaa pe n baa bodi po. O kan gedi ki ban lingi yaa pebiga n yaadi. O kan buu yaa pia n poagili. O kan dini yaa pe n pia laafia ban guo. Ama o baa yaa ŋmani yaa pe n pia mi kpama, ki ŋmani ki ban taani leni a taawoga kuli.»

¹⁷ Fala n baa ku yankpaayuogu, Yaagu n ŋaa i pe. Bu toabu n bolini o nuu paalu leni o nuni gbanmanu, Ke o nuu n faani, O jiennunbu mo n fiadi!