Sakari 10 - U TIENU MAAMA TILI 2013

U Tienu bebe n fidi bonla kuli

¹ A siakuana yaa pundi, Yin mia mani o Diedo ki taaga n mi. O baa teni kan yini ki mi hali boncianla. Yuakuli kuanu baa guani ki boandi.

² Diidi mani i buli n guandi yi Yaala kuli tie faama, A baabuula n doagidi yaala kuli Tie faama, Yaaba n bundi ti dangidi maadi mafanma, Ki baagidi yi fanma fanma. Lani n cedi ke bi niba puagi ki lindi Ki laadi fala nani yaa yankulu N ki pia kpaalo yeni.

³ O Diedo yedi: «N pali beni leni bi yankpaaba Yaaba n gobidi n niba. N baa waani a ŋuabuana fala. Mini Li Miali Diedo U Paalu Kuli Daano, N baa taa n niba, Juda yaaba, ki kubi ba. Bi baa tua nani n tanjagido, Min jagi yua leni ti kpiagidi bu toabu po.

⁴ Li tanpuuli tanjigi, li gbandieli kpaali Leni bu toabu dabanli Baa ña Juda yaaba siiga, Bi yudanba buoli buoli baa ña bi siiga,

⁵ Ki taani nani a jakoanda yeni, Ki ŋmaa yaaba n koani leni ba Nani i sani nni moamoadi yeni. Bi baa koani yeni, Kelima mini o Diedo ye leni ba. I fe baa cuo bi yibalinba yaaba n jagi i taami.

⁶ N baa pa Juda yaaba u paalu, Ki faabi bani Isidayeli yaaba. N baa gbadi bi po mi ninñima, Ki lebidi ki guani ba bi deni. Bi baa yaa tie n po nani mii den kpa Yie ba ba yenma yeni, Kelima n tie o Diedo, bi Tienu. N baa gaa bi miabu.

⁷ Isidayeli buolu baa yaa tie nani a jakoanda yeni, Bi pala baa yaa mani Nani yaaba n ñuni mi daama yeni. Bi puoliŋuani baa le o Diedo N baa pa ba yaa pamancianli yeni.

⁸ N baa teni ban kpaani ki taani n niba, Min faabi ba ki teni ban yabidi Nani ban den kpa yabi maama.

⁹ N den yadi ba i nilanbuoli nni, Ama bi den tiani n po, Ba ke bi den ye foagima. Bani leni bi bila kuli baa ciadi, Ki yegi ki lebidi ki kpeni.

¹⁰ N baa ñani ba Ejipiti leni Asiiri diema nni, Ki guani ki kpenni n ba bi deni. N baa kaani ba Galaadi leni Liban diema nni, Ama ba yeni, mi fanma kan dagidi ba.

¹¹ Bi baa duodi li paboanli ñincianma, Bi baa pua ki duani mi ñincianma ñingola, U kpenu Nili baa ñuudi. Asiiri yaaba japaadi baa jiidi, Li bali mo n bodi Ejipiti nni.

¹² N baa pa n niba u fidu, Bi baa yaa kpiagidi nni, Ki tuodi ki tiendi min yedi yaala. Mini o Diedo n yedi yeni!»