Sakari 1 - U TIENU MAAMA TILI 2013

Sakari bonlekaala 1—8 U Tienu yini o niba ke ban guani o kani

¹ O bado Dariyusi bali binlieli, cinii yogunu, o Diedo den maadi leni Ido yaabili Berekia bijua, o saawalipualo Sakari, ki yedi o ke wan waani Isidayeli yaaba yaa maama n tie ne:

² «O Diedo U Paalu Kuli Daano pali den beni yi yaajanba po boncianla.

³ Ama moala, ŋan yedi ba daa: ‹Yin lebidi ki guani mani n kani, nmoko baa guani yi kani.› Mini Li Miali Diedo U Paaciamu Kuli Daano n yedi yeni!

⁴ Yin da tua mani nani yi yaajanba yeni. Hali yogu, n saawalipuaba den wangi ba ke n yedi ban lebidi ki ŋaa bi sanbiadi leni bi bontienka-biadila. Ama bi den yie kaa cengi nni, baa den tuo ki ŋoadi min yedi ba yaala.

⁵ Yi yaajanba, bi ye le? Naani bi saawalipuaba yeni baa ki ye?

⁶ Ama min den teni n naacenba, bi saawalipuaba yaa ñoamabona leni yaa mabilikaama kuli, den cuo yi yaajanba pala. Bi den lebidi bi tagi ki yedi: ‹Li Miali Diedo U Paalu Kuli Daano soani ti nani ti tagi leni ti tuona n den teni ke o jagi ke o baa soani ti maama.› »

Sakari bonlekakpiala: i taami

⁷ Dariyusi bali binlieli, piiga n cilo, ban yi yaa ŋmaalo Sevati, piilie n danaali, o Diedo den maadi leni Berekia bijua, Ido yaabili o saawalipualo Sakari.

⁸ Laa ñiagu n den laa li bonlekaala. N den laa o tanjagilo, ke o jagi tanmoano, ki se ku joaloangu nni mirti tiidi siiga. Tantoe den se o puoli po, ke bine moani, bine mo moani ki bua ki yaa boani, bine mo pieni.

⁹ N den buali: «I naa taami mo tie be, n Diedo?» Lane maleki yua n den maadi leni nni, den guani ki yedi nni: «N baa bundi a po ban tie yaala.»

¹⁰ Wani yua n den se militi siiga den pugini ki yedi: «Bi tie o Diedo n soani yaaba ban goandi mi tinfanma.»

¹¹ Bi den maadi leni o Diedo Maleki yua n se mirti tiidi siiga yeni, ki yedi: «Ti goandi mi tinfanma ki sua ke mi yanduanma bebe n ye lienni.»

¹² Lanwani, o Diedo Maleki yeni den maadi, ki yedi: «Li Miali Diedo U Paalu Kuli Daano, dinla n tie bina piilele leni a pali n beni Jerusalemi yaaba po leni Juda dogi yaaba po. Moala, gbadi bi po mi ninñima.»

¹³ O Diedo den lebidi Maleki yeni yaa maama n pia li papaali leni i baagi.

¹⁴ Lani, o Diedo Maleki yeni den yedi, ke min kpaani ki waani ke Li Miali Diedo U Paalu Kuli Daano yedi yaa maama n tie ne: «N pia Jerusalemi yaaba po leni Siyon juali po, yaa buama n yabi boncianla.

¹⁵ Ama n pali be yaa nilanbuoli n jigini bi yula po boncianla, kelima n pali n da den be Isidayeli yaaba po waamu waamu yaa yogunu, i nilanbuoli yeni den taani ki cuani bi tingbali.

¹⁶ Li tie lani yaa po yo, ke Li Miali Diedo U Paalu Kuli Daano yedi yaa maama n tie ne: ‹N go baa lebidi ki cua Jerusalemi leni mi ninñingbadima. N diegu go baa guani ki maa, u dogu moko go baa guani ki maa.› »

¹⁷ Maleki go den yedi nni, ke min waani yaa maama n tie ne: «Li Miali Diedo U Paaciamu Kuli Daano yedi ke o dogi go baa gbie mi piama. O baa baagi Siyon yaaba, ki go guani ki gandi Jerusalemi.»