Ruti 3 - U TIENU MAAMA TILI 2013

Ruti duani Boasi kani

¹ Ruti yaanaa Noemi den ti yedi o: «N bisalo, n bua ki lingi a po u kaanu ke a yema n yaa mani.

² Ŋan yen caa ki ŋua Boasi yua yaa tuonsoanba puoli ki liegi yeni tie ti kpiilo, nani ŋan bani maama. Dinla ñiagu, o baa lendi u jalu nni orje.

³ Ŋan wali ki tieni tulale, ki yie a tiadi yaadi n ŋani ki cie, ki gedi u jalu po. Die ŋan da tuo Boasi n bandi ke a ye likani, hali wan ban je ki go ño ki gbeni no.

⁴ O yaa gedi ki baa duani yaa yogunu, ŋan kpaagi ki le wan duani naani. Ŋan nagini ki pindi o kpalibu o taana po, ki bali ki duani. Wani o ba n baa waani a ŋan baa tieni yaala.»

⁵ Ruti den guani ki yedi: «N baa tieni ŋan yedi yaala kuli.»

⁶ O den gedi u jalu po ki tieni o yaanaa n yedi o yaala.

⁷ Boasi den dini ki go ñuni ke o pali mangi, ke o gedi ki duani orje tinli kani. Lane Ruti den tieni dindini ki gedi ki pindi o kpalibu o taana po, ki bali ki duani.

⁸ Ku yoagisiigu, Boasi den jie ki fundi ki tibini ki diidi ki laa ke o pua dua o taana kani.

⁹ O den yedi: «Ŋme yo?» O pua yeni den guani ki yedi: «N daano, li tie mini a puotuado Ruti yo. Ŋan taa nni ki nagini a kani ki kubi nni, kelima ŋan tie n calo kpiilo yeni, a pia u sanu ki taa nni ki nagini a kani.»

¹⁰ Boasi den yedi: «O Diedo n seligi a n bisalo! Ŋan cua n kani ki naa lingi jawaaba, yaaba n luo bi yaaba n pia yeni, li doagidi a buama ki cie ŋan den kpa tieni yaala kuli.

¹¹ Moala ŋan da go jie liba kuli. N baa tieni a po ŋan yedi yaala kuli, kelima u dogu yaaba kuli bani ke a tie puomoano.

¹² Li tie moamoani ke n tie a calo kpiilo, ki pia u sanu ki taa ŋa ki kubi a, ama nitoa ye ki kpi leni a calo ki cie nni.

¹³ Ŋan duani ne hali lan faa. Saala, o yaa sua ke o bua ki taa ŋa ki kubi a nani lan bili ke o pia u sanu ki taa ŋa maama, wan taa ŋa. O yàá bua mo, hali o Diedo yua n fo po, mini wani n baa taa ŋa ki kubi a. Duani hali lan faa.»

¹⁴ O den dua o taana kani ki faa fii hali ke li daa yendi. Boasi ki den bua ban bandi ke o pua kua u jalu nni.

¹⁵ Boasi den yedi Ruti: «Tandi ŋan pini yaa kpalibu, ki mubini bu bonŋanla.» Ruti den tandi o kpalibu ke o biigi orje nani yiemuluoba, ki tuni o. Li yaa puoli, o den guani ki kuni u dogu po.

¹⁶ Ruti den pundi o yaanaa Noemi kani ke o buali o: «Li ban tua lede n bisalo?» Lane Ruti den togidi o Boasi n tieni o po yaala kuli.

¹⁷ O go den pugini ki yedi: «O puni nni orje yiemuluoba ki yedi ke n kan guani a po nukuomu.»

¹⁸ Lanwani, Noemi den yedi: «Duani a yama n bisalo, hali ŋan baa bandi laa bonla kuli n baa juodi maama yaa yogunu. Boasi kan pa o yuli fuodima, o yàá ŋanbi ki gbeni laa maama dinla.»