Ruti 1 - U TIENU MAAMA TILI 2013

Yaa yebiadima n ŋmaa Elimeleki diegu 1 Yaa yebiadima n baa Elimeleki leni o niba

¹ Bi bujiaba n den gobidi Isidayeli yaaba yaa yogunu, mi koma den tieni Isidayeli diema nni. Laa diema tinbuoyenli, yaali n yi Juda yaa joa den fii leni o pua leni o bijaliediba, ki ñani Betelemi dogu nni ki gedi Moabi diema nni. Bi den ban kali lanpo yogunuba po.

² Laa joa den yi Elimeleki, o pua Noemi, o bijaliediba mo Malon leni Kiliyon. Bi den tie Efrati cuuli yaaba, ki ye Betelemi, Juda tinbuoli nni. Bi den pundi ki kali Moabi diema nni.

³ Noemi calo Elimeleki yeni den kpe ki ŋaa o leni o bijaliediba.

⁴ O bijaba yeni den taa bi puoba Moabi yaaba siiga. O puoyendo den yi Olipa, o lielo mo Ruti. Bi den ye likani ke li bua ki pundi bina piiga.

⁵ Malon leni Kiliyon den kpe. Noemi ji den ye waa pia bila, waa pia joa.

Ruti leni Noemi yegi ki guani Betelemi

^6-7 Moabi diema nni, Noemi den gbadi ke o Diedo noanli ki laa o niba po, ki puni ba mi jiema. Wani leni o biyuamu den bogini ki ñani lipo, ki baa guani Juda diema nni. Bi den fii ki ñani ban den ye naani ki taa u sanu.

⁸ Noemi den yedi o biyualiedimu: «Yikuli n guani ki kuni yi naanba po. O Diedo n ŋanbi yi po nani yin den ŋanbi n niba yaaba n kpe leni mini n ba yaa po maama.

⁹ O Diedo n teni ke yi kuli n baa bi jaba, ki go pa yi mi yemanma yi calinkpendiedi nni!» O den gobini ba ki cabi ba. O biyuamu den buudi boncianla,

¹⁰ ki yedi o: «Kalam, ti baa yegi leni a ki gedi a buolu po.»

¹¹ Noemi den yedi ba: «N bisiaba, lebidi mani. Be yaa po ke yi baa yaa ŋua nni? N kan go maa bonjala yaaba n baa ti fidi ki tua yi ciaba.

¹² Lebidi mani. Yin kuni, kelima n podi ki pendi yua n baa kuni joa. Ba n yaa yedi ke n pia mi suginma ke n baa baa biga, ba dinla ñiagu n yaa taani leni joa ki mali bonjala,

¹³ naani li baa tuo yin guudi hali ban fandi? Naani li baa teni yin yie ke yi kan kuni jatoaba? Aa-a, n bisiaba, kelima o Diedo faligi mine. N fala yabi ki cie yi yaa fala.»

¹⁴ Mu biyualiedimu yeni go den buudi ki pugini. Olipa den gobini o yaanaa Noemi ki cabi o leni mi buama. Ama Ruti wani den yie ke o kan paadi leni o.

¹⁵ Noemi den yedi Ruti: «Diidi, a puolielo lebidi ki guani o buolu leni o tieni po. Amo n lebidi ki guani nani a puolielo n tieni maama.»

¹⁶ Ama Ruti den guani ki yedi: «Da tigini nni ke min lebidi ki ŋaa ŋa ki kuni n denpo. Ŋan baa gedi naani, Nmoko baa gedi lankane. Ŋan baa yaa ye naani, Nmoko baa yaa ye lankane. A buolu baa tua n buolu, A Tienu baa tua nmoko yaa Tienu.

¹⁷ Ŋan baa kpe naani, Nmoko baa kpe lankane, Bi baa piini nni lankane. N yaa paadi leni a ke laa tie mi kuuma yaa ka paadi ti, o Diedo n cuo nni o cuonbiadu.»

¹⁸ Noemi n den laa ke Ruti sedi ke se o ciani o, o den cedi kaa go tigini o.

¹⁹ Bani bonbilie yeni kuli den yegi ki kuni Betelemi. Ban den kua u dogu nni, li den ludi u dogu nni yaaba kuli, ke bi puoba tua: «Li ko li tie Noemi yo?»

²⁰ O den yedi ba: «Yin da go yini nni Noemi, yin ji yaa yi nni Mara, kelima U Paaciamu Daano boandi n pali hali boncianla.

²¹ N den ñani ne leni u nukubidu, Ke o Diedo guani nni leni u nukuomu. U Paaciamu Daano buli nni o nunga, Ki teni ke mi yebiadima ŋmaa nni, Lanwani yi baa gaa lede ki nan go yaa yi nni Noemi?»

²² Noemi n den ñani Moabi diema nni ki kpeni maama n yeni. Wani leni o biyuaga Ruti Moabi diema yua, den pundi Betelemi orje cema yogunu.