Pisomi 92 - U TIENU MAAMA TILI 2013

Pisomi 92 O niteginka jaandi

¹ Pisomi. Mi fuodima daali yanbu.

² Li ŋani tin pagi o Diedo, Ki yiini ki pagi Tanpoli Tienu yeli,

³ Ki waani o ŋanbili tiŋaagu kuli, Ki doagidi o teginma ku ñiagu.

⁴ Tin pagi o leni yaa gogiditi n pia joma piiga, Leni a gogidibila leni ti gogidiciandi.

⁵ O Diedo, a mangidi n pali Leni ŋan tiendi yaala! N baa kpaani ki doagidi a nii tuona.

⁶ O Diedo, a bontienkaala yabi lede nne! A yantiana mo ki pia bandi-gbenma lede nne!

⁷ O yanpiidaano naa bani liba kuli, O yanluodaano mo ki pia lienni banmiba kuli.

⁸ Bi nibiadiba yaa bundi nani ti muadi yeni, Ke yaaba n tiendi yaala n ki tiegi mo Yigidi nani mi puuma yeni, Li tie ke bi baa bodi ki kan go fii yo.

⁹ Ama fini Li Miali Diedo, A tie tanpolijoma Badiciamo, Ki die li bonla kuli hali yaa yogunu kuli.

¹⁰ O Diedo, diidi a yibalinba nne! Diidi a yibalinba yeni bodi, Yaaba n tiendi yaala n ki tiegi kuli yadi.

¹¹ A pugini n fidu nani o moanua yeni. A kaani nni yaa kpama n soangi nni.

¹² N nuni maa yaaba n fii ki sedi n po, N tuba mo gba yaaba n fii ki sedi n po Leni mi biadima bubula.

¹³ Bi niteginkaaba bundi Nani bu kpakpalibu yeni, Bi kpedi tontoni nani Liban sediri tiidi yeni,

¹⁴ Bi ŋuu ba o Diedo diegu nni, Ke bi puudi ti Tienu diegu luoli po.

¹⁵ Bi baa yaa maa ba bi podi nni, Ki ye leni u fidu ki bundi ki pugidi.

¹⁶ Bi baa yaa wangi ke o Diedo tiegi, ki tua: «O tie n tanciangu ke tagiliba mo ki ye o niinni.»