Pisomi 9 - U TIENU MAAMA TILI 2013

Pisomi 9 O Diedo, a luoda leni fala danba faabika

¹ Bi yanyinba yudaano yani siiga yanbu. Davidi yanbu, ban yiini yaabu leni ki nialiñiliga.

² N baa kpiagi o Diedo leni n pali kuli, N baa togidi a tuonŋama kuli.

³ N baa mangi n pali a yeli nni Leni li pamancianli, N baa yiini ki kpiagi a yeli, Fini, Tanpolijoma Tienu.

⁴ N yibalinba sudi ki guani puoli, Ki tuudi ki baa ki bodi a nintuali,

⁵ Kelima fini n koani ki gaa nni, Ki saa n po i moamoani. A kaa ti gbandi po ki ja yaa buudi n tiegi.

⁶ A fu leni i nilanbuoli, ki kpani bi nibiadiba. A baa duuni ki ñani bi yela Yaa yogu n tuu yaa yogu kuli po.

⁷ Yibalinba kuli bodi, Bi diedi tua diegbendi yaa yogunu kuli po. Ŋan bolini yaa dogi kuli, bi kan go tiadi yi po.

⁸ O Diedo kaa ti gbandi po, Yaa yogu n tuu yaa yogu. O bili o bali kalikaanu li bujiali po.

⁹ Wani n gobidi li ŋandunli leni mi teginma, Ki ja ti buudi bi niba po Nani lan tiegi maama.

¹⁰ O Diedo n tua kaanpaalu Ban mabindi yua po, Ki tua kaanpaalu li paboanli daali.

¹¹ Yaaba n bani a yeli dugi a po, Kelima fini o Diedo kan ŋaa yaaba n lingi a.

¹² Yiini mani ki kpiagi o Diedo Yua n ye Siyon. Togidi mani bi niba nintuali o tuonŋanciama,

¹³ Kelima o baa tuu li panli Yaa soama n wuli po, O tiani mi po, O kan sundi bi ninñinniba moe po.

¹⁴ Gbadi n po mi ninñima, fini o Diedo! Diidi ki le yaaba n nani nni, N wangi nni fala maama! Fini yua n faabi nni leni mi kuuma,

¹⁵ Ki bua min togidi a pagidi kuli, Siyon dogu buliñoana kani, Ki mangi n pali a faabima po.

¹⁶ I nilanbuoli jiidi ban gbini yaa buogu nni, Bi taana mo ŋmaa ban wuoni ki dia yaa diagu nni.

¹⁷ O Diedo doagidi wan tie yua, O saagi i moamoani. O nibiado n dia yaa diagu guani ki cuo o. Joma

¹⁸ Bi nibiadiba baa guani bi tinkpiba diema nni, Bani yaa nibuoli n sundi U Tienu yeni.

¹⁹ Ama U Tienu kan sundi o luodo po abada, Bi ninñinniba mo yaa dugidi kan bodi, Ba lan waagi maama kuli.

²⁰ O Diedo, fii ki sedi o nisaalo n da paadi a. Teni i nibuoli buudi n jia a nintuali.

²¹ O Diedo, teni ti jawaandi n cuo ba, Ban bandi ke bi li tie nisaaliba bebe. Joma.