Pisomi 81 - U TIENU MAAMA TILI 2013

Pisomi 81 N niba yaa bi cengi n maama!

¹ Bi yanyinba yudaano yani siiga yanbu, Asafi yaabu, ban yiini yaabu leni Gati gogidigu.

² Kpaani ki doagidi mani yi pamanli, U Tienu yua n tie ti fidu po. Yiini mani ki kpiagi Jakob Tienu!

³ Ti baantiadi n pua a gangaana Leni ti gogiditi. Joma

⁴ Piebi mani li naatuntunli O ŋmapaano daali jaanma po Leni u cipienu daali, ti jaanma po,

⁵ Kelima li tie bali maama Isidayeli po, Wani Jakob Tienu n ñani laa mabilikaama.

⁶ Wani n bili laa bali maama Josefi diegu po, Wan den koani leni Ejipiti diema yaa yogunu. N gbadi min kaa bani yaa nialu ke u tua:

⁷ «N kagidi a boacabili po li tugikpiagili. N teni ke a tugidi a tugikpiagili.

⁸ A paboanli nni, a kuudi ke nmo faabi a. N den gaa a jaandi i tatantani nni, Ki biigi a Meriba ñinbunli kani.» Joma

⁹ N niba, cengi mani, n baa tuodi ki waani yi. Isidayeli yaaba, yi yaa bi cengi n maame,

¹⁰ Yi kaa bi pia kaanu buloba kuli po! Yi kaa bi pia bogida bulamoba kuli po!

¹¹ Mini n tie Li Miali Diedo yi Tienu, Yua n ñani yi Ejipiti diema nni. Yaadi mani yi ñoana, n baa dini yi Hali yin guo.

¹² Ama n niba naa cengi nni. Isidayeli yaaba naa tuo n maama.

¹³ Lanwani, nmo den ŋaa ba Ke bi ŋoadi bi pajuaga n bua yaala, Bani mo den ŋoadi ban bua yaala.

¹⁴ A laa, n niba Isidayeli yaaba Yaa bi cengi n maame, Bi yaa bi ŋua min bili bi po yaa sanbila yo,

¹⁵ Se min bi jaligi ki fiagi bi yibalinba, Se min pua bi koanginkaaba.

¹⁶ Yaaba n nani o Diedo baa cua Ki gunbi o kani leni ti ñoamamandi. Isidayeli mo yaa yema baa yaa mani Yaa yogunu kuli po.

¹⁷ U Tienu bi baa dini ba, Yaa ŋalikama n ŋani ki cie, Leni yaa siadi n ñani ku tangu nni, Ban guo.