Pisomi 6 - U TIENU MAAMA TILI 2013

Pisomi 6 O Diedo, tieni sugili

¹ Bi yanyinba yudaano yani siiga yanbu, ban yiini yaabu leni yaa gogiditi n pia jominii. Davidi yanbu.

² O Diedo, da waani nni fala a pabienli nni, Da faligi nni a pabiencianli nni.

³ O Diedo, gbadi n po mi ninñima, N tadigi, paagi nni! N digibi leni n kpaba kuli, Paagi nni o Diedo, Kelima n gbanu kuli digibi.

⁴ N yama yagi hali boncianla. Da go guudi lan waagi!

⁵ O Diedo guani ki cua ki faabi nni, Faabi nni kelima a ŋanbili po.

⁶ Mi kuuma nni, bi kan go tiadi a po. Bi tinkpiba n ban ye naanpo, Ŋme n baa pagi a yeli?

⁷ N ñiidi ñiidi ki coagi, Ñiagu kuli n nunsiidi yen dua ki wuliti. N nunsiidi moagidi n duanu.

⁸ Li paboanli teni ke n nuni ñuagi. N yibalinba yabinu teni ke n nuni tadigi.

⁹ Fuadi mani n kani, yinba yaaba N tiendi yaala n ki tiegi kuli, Kelima o Diedo gba ke n mua ki figindi.

¹⁰ O Diedo gbadi min mia o yaala, O Diedo gba n jaandi.

¹¹ I fe leni ti jawaandi Baa cuo n yibalinba kuli, Ban sudi ki guani puoli kelima i fe po.