Pisomi 51 - U TIENU MAAMA TILI 2013

Pisomi 51 Sugili miabu jaandi

¹ Bi yanyinba yudaano yani siiga yanbu. Davidi yanbu.

² Li maadi o saawalipualo Natan n den gedi ki laa Davidi, wan den conbi leni Bati-Seba yaa yogunu.

³ Ŋain U Tienu, gbadi n po Mi ninñima a ŋanbili po. A ninñingbadicianma po, Duuni ki ñani n po n tagili.

⁴ Ŋuudi ki ñani n tagili, Ŋuudi ki ñani n po n tuonbiadi,

⁵ Kelima n tuo ki bandi n tagili, Yogunu kuli n tuonbiadi ye n nintuali.

⁶ N tieni a po ti tuonbiadi, N tudi fini bebe yaa po yo, N tieni yaala n bia a nuni po. Yeni, a yaa maadi, Li baa sua ke a pia i moamoani. A yaa jia n buudi mo, li kaa pia poadoba.

⁷ Diidi n mali i tagili nni, N naa punbi nni leni ti tuonbiadi.

⁸ Ŋan bua ki le yaala o nisaalo pali nni, N tie i moamoani. Hali n pali tugu nni, n miadi a mi yanfuoma.

⁹ Taa isope faadi ki mii ki ŋanbi nni, Yeni n baa ŋanbi cain. Ŋuudi ki ŋanbi nni, Lani, n baa yaa pieni ki cie a tatana.

¹⁰ Teni min le li pamancianli. Teni ŋan mudi n kpaba ya yeni mo N le li pamankandikaali, ki jeli ki ciaga.

¹¹ Buli a nunga ki da nua n tuonbiadi. Duuni ki ñani n po n tagili kuli.

¹² Ŋain U Tienu, pa nni yaa pali n pieni, Pandi mi tuoma yantiali n niinni.

¹³ Da tuo min foagidi leni a. Da ñani a fuoma yaama n gagidi n niinni.

¹⁴ Pa nni a faabima pamanli, Ki teni li yantiaŋanli n yaa ye leni nni.

¹⁵ N baa bangi yaaba n yie ŋa a sani, Lani, ti tuonbiadi danba baa lebidi Ki guani a kani.

¹⁶ Fini n Tienu, n faabima Tienu, Faabi nni leni min wuli yaa soama, Lani, n lanbu baa kpaani ki doagidi a teginma.

¹⁷ O Diedo, yaadi n ñoacuuna Lani, n ñoabu baa kpaani ki doagidi a pagidi.

¹⁸ Ŋaa bua padili, Lani yaa ka n bi baa padi a po. Ŋaa bua ba padijuukaali.

¹⁹ Yaa pada n mani U Tienu po tie Ti tuonbiadi yanyagidi n cie yua yaa jigi, U Tienu, a kan fali Ti tuonbiadi paboanli n pia yua ke o jigi cie.

²⁰ Ŋanbi Siyon po kelima a ŋanma po, Ki guani ki maa Jerusalemi dogu bilini.

²¹ Lani, a baa tuo ki gaa mi teginma pada, Ki taani leni a padijuukaana Leni yaa pada n juu ki buodi cain. Lani, bi baa padi a naatona a padibinbinli po.