Pisomi 5 - U TIENU MAAMA TILI 2013

Pisomi 5 O Diedo n gaa yua yaa cangu jaandi

¹ Bi yanyinba yudaano yani siiga yanbu, ban yiini yaabu leni mu yelimu. Davidi yanbu.

² Diadi a tubili ki cengi n maama, o Diedo! Gbadi n po mi ninñima, gbadi n ñiindi.

³ Cengi nni bonŋanla n yaa kpaani Ki maadi leni a, fini n bado leni n Tienu, Fini n tie min jaandi yua.

⁴ O Diedo, ku tiŋaagu a yen gbadi n nialu. Tiŋaagu kuli n yen cua ki yaa se a kani ki guu.

⁵ Ŋaa tie yaa Tienu n bua mi biadima, Mi biadima ki ye a nintuali.

⁶ Bi nibiadiba kan baa sedikaanu a nintuali, A nani yaaba n ki tiendi yaala n tiegi kuli.

⁷ A bolindi bi tuofaadanba, O Diedo pali fa yaaba n wuliti Mi soama leni bi nunfandanbiadiba po.

⁸ A ŋanbicianli po n teni Ke mini wani kua a diegu nni, Ki gbaani ki pugi a leni ŋan pundi Ki baa yaa fangili a diegagidikaali nni.

⁹ O Diedo, gobidi nni a teginma nni, Kelima yaaba n sedi n po yabi. Ŋanbi a sanu n nintuali.

¹⁰ Bi maama ki pia dugidi, Bi pala n jagi yaala kuli tie kukpali. Bi niabonma kuli tie nani yaa takuli n yaa yeni, Bi landi mo pia i boandi.

¹¹ Guani ba bi biadima panpaani. Ban jagi yaala n cuani bi tingbali. Deli ba kelima bi tagili ki pia bianu, Kelima bi fii ki yie a po.

¹² Yeni yaaba n cua ki wuoni A kani kuli pala baa mangi. Bi baa yaa ye leni li pamankandikaali Yogunu kuli ke a kubi ba mo. Yaaba n bua a yeli baa mangi bi pala leni a,

¹³ Kelima fini o Diedo, a seligi a niteginka, Ki gaani ki lindi o leni a ŋanbili Nani li gbankoandigu yeni.