Pisomi 22 - U TIENU MAAMA TILI 2013

Pisomi 22 N Tienu, be yaa po ke a ŋaa nni

¹ Bi yanyinba yudaano yani siiga yanbu, ban yiini yaabu leni ki tiŋaaboaliga gogidimuanu. Davidi yanbu.

² N Tienu, n Tienu, be yaa po ke a ŋaa nni? N wolingu kuli naa cuani n po ciadima.

³ N Tienu, n kpaani ki miadi a u yensiinu, Ama ŋaa guandi nni liba, Ku ñiagu mo mii ŋmini.

⁴ Ama a tie yaa Tienu n gagidi ki ŋani, A kaa a bali kalikaanu Ke Isidayeli yaaba pagi a.

⁵ Ti baanba den dugi a yaa po yo. Bi den dugi a po, ke a faabidi ba.

⁶ Bi yen kpaani ki miadi a todima Ke a yen faabidi ba. Ban den dugi a po yeni, baa den laadi fe.

⁷ Ama mini wani n tie sidibilo, Mii tie nisaalo ka. N tie ban fali ki go sengi yua.

⁸ Yaaba n nua nni kuli ñuadi nni, Ki miani bi ñoana ki duani bi yula,

⁹ Ki tua nni: «A taa a yema ki teni o Diedo, Lanwani o Diedo n nan faabi a! Wani yua n bua ŋa yeni, wan gaa ŋa!»

¹⁰ Moamoani de, fini n ñani nni N naa tugu nni, ki babini nni o biili.

¹¹ Hali min ñani n naa tugu nni, Bi den piani nni fine. Hali n naa tugu nni, fini n tie n Tienu.

¹² Da foagidi leni nni, Kelima li paboanli nagini n kani, Niloba mo ki kpendi ki baa todi nni.

¹³ A naatona boncianla gaani ki cebini nni. Basan naatona lindi ki cebini nni.

¹⁴ Bi yaadi bi ñoana ki teli nni, Nani yaa yangbanli n dia ki toadi Ki nan buoni yeni.

¹⁵ N fidu gbeni nani yaa ñima n wuli yeni. N kpaba kuli tugidi tugidi leni aya. N papaali nandi nani ti sindi yeni.

¹⁶ N nialu kuodi nani ki tanciaciaga yeni. N lanbu mo tabi n lanŋaandi. A ŋaa nni mi kuuma tangungu nni.

¹⁷ I sangbanli gaani ki lindi nni, Bi nibiadiba gangi ki lindi nni. Bi kpaa ki lugidi n nii leni n taana.

¹⁸ N dondi, hali yaala Ke n baa fidi ki coadi n kpaba kuli. Bi nibiadiba yeni diidi nni ki kpaagi nni.

¹⁹ Bi boagidi n tiayiekaadi bi siiga, Ki toa n liadicianli po tiatia.

²⁰ Fini o Diedo da foagidi leni nni! Fini yua n tie n fidu, Jaligi ki cua ki todi nni.

²¹ Faabi nni leni bu toabu, Faabi nni leni i sangbanli paalu!

²² Faabi nni i yangbanli ñoana nni Leni o moanua yina. A guani n po,

²³ Lani n teni ke n baa waani A yeli n kpiiba siiga, Ki pagi a li nitaanli siiga ki yedi:

²⁴ «Yinba yaaba n fangi o Diedo, Pagi o mani! Yinba Jakob puoliŋuani kuli, Kpiagi o mani! Isidayeli puoliŋuani kuli, Jie o mani ki digibi o nintuali!

²⁵ Kelima o kan nuali ki fali, Bi ki sengi o ninñinnilo fala. O kan buli o o nunga mo. Ama o cengi o, O yaa kpaani ki mia o todima.»

²⁶ Li nitaancianli nni a baa tua n po pagidi. Yaaba n fangi a nintuali n baa kuani n ñoaniani.

²⁷ Bi yumiindanba baa je ki guo, Yaaba n lingi o Diedo baa kpiagi o. Wan teni yin yaa ye yaa yogunu kuli!

²⁸ Ŋanduna kuli yaaba baa tiadi fini O Diedo po ki guani a kani. Li ŋandunli nibuoli kuli baa cua, Ki gbaani a nintuali.

²⁹ Kelima o Diedo n die li bali Ki die i nibuoli kuli.

³⁰ Ki tinga nni paatieba dini a kani, Bi baa gbaani ki pugi a. Yaaba n baa kpe ki guani mi tama nni, Mo baa cua ki gbaani a nintuali, Kelima a kan cedi ban yaa ye.

³¹ Bi puoliŋuani baa soani o Diedo po, Bi baa maadi o Diedo maama Yaa nifiima n kpendi po.

³² Bi baa waani yaa nifiima n baa cua, O Diedo n tieni o niba po yaala.