Pisomi 21 - U TIENU MAAMA TILI 2013

Pisomi 21 O bado baa fidi ki dugi o Diedo po

¹ Bi yanyinba yudaano yani siiga yanbu. Davidi yanbu.

² O Diedo, o bado mangidi o pali a paalu po. A faabima n kpendinni o po li pamancianli.

³ A puni o o pali n den bua yaala. Ŋaa muni o wan den sugini ki baa yaala mo. Joma

⁴ A togidi o leni yaa seli n ŋani bonŋanla, Ki cibini o wulamoano badifogiliga.

⁵ O den miadi a li miali, a den puni o li, Ki foagidi o dana.

⁶ O kpiagidi yabi kelima a faabima po. A kpiagi o ki go puni o ti jigidi.

⁷ A teni ke o tua li seli bonla, Yaa yogunu kuli po. A puni o li pamankandikaali a nintuali.

⁸ O bado dugi o Diedo po, Tanpolijoma Tienu ŋanbili mo, Kan cedi wan ŋmadi ki baa.

⁹ U Tienu, a nuu baa nandi a yibalinba kuli. A nujienu baa nandi yaaba n nani a.

¹⁰ O Diedo, a yaa doagidi yaa daali, A baa buoni ba mi fantama nni. O Diedo pabienli nni, o baa nali ba, U mu mo baa je ba!

¹¹ A baa bolini bi puoliŋuani u tingbanu po, Ki bolini bi buolu mo, bi nisaaliba siiga.

¹² Bi yaa jagi a po yaala n bia, Ki juogidi ki bua ki janbi a, Bi kan fidi ki tieni puu kuli.

¹³ A baa toa ba a piemi, Ki deli ba.

¹⁴ O Diedo, fii ki sedi leni a paalu! Ti baa ki yiini ki go pagi a jama.