Pisomi 2 - U TIENU MAAMA TILI 2013

Pisomi 2 U Tienu n kaani yaa bado ti gbandi po

¹ Be n teni ke bi nilanba fii ki tiendi ku fuugu, Ke i nibuoli mo pia laa yantiabiada?

² Ki tinga badiba kuli fii ki sedi. Bi badijaba mo taani ki tuu ñoayenbu, Ki fii ki sedi o Diedo, Leni wan gandi yua yaa po ki tua:

³ «Tin dadi ki cie ban luo ti leni yaala, Ki faabi ti yula leni bi kpaadi.»

⁴ Yua n kaa tanpoli po ti gbandi po laa ba ti laadi, Ke wani o Diedo mo ñuadi ba.

⁵ O maadi leni ba o pabienli nni, Ki jiendi ba o pabienkandikaali nni, ki yedi:

⁶ «Mini n gagidi n bado ki kaani o Siyon, n joagagidikaali yuli po.»

⁷ N baa kpaani o Diedo ñoamabonli. O yedi nni: «A tie n bijua. Mini n mali a dinla.

⁸ Mia nni, n baa pa ŋa i nibuoli ban tua a faali, Ki teni ŋan diedi hali ki tinga bianu.

⁹ A baa mudi ba leni ti kudi gbiamu, A baa mudi ba yomi yomi, Nani o maado bobili yeni.»

¹⁰ Moala yinba bi badiba, Baa mani mi yanfuoma, Yinba ki tinga bujiaba, Gaa mani i tundi.

¹¹ Soani mani o Diedo po leni li fangili, Mangi mani yi pala, ki yaa digibi mani.

¹² Pugi mani o bijua, Wan da ti bieni o pali, Ki teni yin bodi cain, Kelima o pabienli jaligi. Li pamanli ye leni yaaba n sani ki wuoni o kani.