Pisomi 149 - U TIENU MAAMA TILI 2013

Pisomi 149 Yua n koani ki paadi yanbu

¹ Pagi mani o Diedo! Yiini mani bu yanpanbu o Diedo po! Yiini mani ki pagi o, Bi nidugikaaba taanli nni!

² Isidayeli yaaba n mangi bi pala Yua n tagi ba po! Siyon yaaba n yaa ye leni li pamanli, Kelima bi bado po.

³ Ban pagi o yeli leni ki ciaga, Ki yiini ki jigini o leni ki longa Leni ku gogidigu,

⁴ Kelima o Diedo pali mani o niba po. O jigindi bi yumiindanba ki faabidi ba.

⁵ Bi nidugikaaba n yaa ye leni li pamanli, Ki yaa yigini ki kpiagidi o Diedo Ba bi duani nni!

⁶ U Tienu pagidi n yaa ye bi ñoana nni, O Jugisieñoaliedi mo n yaa ye bi nuu nni,

⁷ Ki tuu i nilanbuoli li panli, Ki faligi i nibuoli.

⁸ Bi baa loli bi badiba leni i kugaali, Ki kpaa bi koanbala mo ti kpaadi.

⁹ Bi baa jia bi po, U Tienu n den diani ki bili yaa buudi. Li tie jigide o nidugikaaba kuli po. Pagi mani o Diedo!