Pisomi 148 - U TIENU MAAMA TILI 2013

Pisomi 148 Mi tagima kuli n pagi o Diedo

¹ Pagi mani o Diedo! Pagi mani o Diedo hali tanpoli po! Pagi o mani, yinba yaaba n ye tanpoli po!

² Pagi o mani, yinba o malekinba! Pagi o mani, yinba o toagola!

³ Pagi o mani, yinba u yienu leni o ŋmaalo! Pagi o mani, yinba yaa ŋmabila n yieni kuli!

⁴ Pagi o mani tanpoli yaa tanpoli! Pagi o mani, yinba yaa ñima n ye Ti tawadi tanpoli!

⁵ Bikuli n pagi o Diedo yeli, Kelima o den li teni ñoamabonle, Ke mi tagima kuli tieni.

⁶ O den sieni ba kaanyendu Ke bi baa yaa ye yaa yogunu kuli, Ki bili yaa bali maama n ki pia miidima.

⁷ Pagi mani o Diedo hali ki tinga nni! Pagi o mani yinba mi ñincianma Leni mi bonfuoda kuli!

⁸ Yinba mi tañigima leni a tatana, Mi tatanyoma leni u mu, Ku gbangbadigu, u faalu leni u tafaalu, Yinba yaaba n tiendi o yanbuama, pagi o mani!

⁹ Yinba a juana leni a joabila, I tilondi leni sediri tiidi kuli,

¹⁰ Yinba ti fuayandi leni ti denyandi, Li bonbalinkaala buoli kuli Leni ti bonyugiditi,

¹¹ Yinba ki tinga badiba Leni i nibuoli kuli, Bi badijaba leni ki tinga gobidikaaba kuli, Pagi o mani!

¹² Yinba bi jawaaba leni bi jafanba, A jakpela leni a bonwaala kuli, Pagi o mani!

¹³ Yikuli n taani ki pagi o Diedo, Kelima wani bebe yaa yeli n ñani, Wani n die ki tinga leni tanpoli!

¹⁴ O pugini o niba paalu leni bi jigidi, Li tie kpiagidi bonla yo o nidugikaaba po, Isidayeli yaaba, bani yaa niba N nagi leni o bonŋanla yeni po. Pagi mani o Diedo!