Pisomi 12 - U TIENU MAAMA TILI 2013

Pisomi 12 U Tienu n todi o niteginka

¹ Bi yanyinba yudaano yani siiga yanbu, ban yiini yaabu leni yaa gogidigu n pia jominii. Davidi yanbu.

² O Diedo, gaa ti, Kelima bi niteginkaaba ki go ye. Bi papiendanba bodi bi nisaaliba siiga.

³ Yuakuli tiendi bu tingbangbaabu, Ki pua o lielo po mi faama. Bi tie palalie danbe.

⁴ O Diedo n bolini i boandi danba Leni yaaba n pia bu lanpaabu kuli

⁵ Leni yaaba n tua: «Ti ñoana teni ke ti pia u paalu. Ti bani mi maama, ŋme n baa diedi ti?»

⁶ O Diedo yedi: «Kelima bi ninñinniba laadi fala, Ke a luoda mo yenbidi, N baa fii ki pa mi faabima, Ban tudi ki piandi yaaba.»

⁷ O Diedo maama tie yaa maama N ki pia joagindi. Mi tie nani ban biigi yaa ŋanjilifa Ki buaga nni taalimilele Ki ŋuudi ki ñani o joagindi.

⁸ Fini o Diedo, a baa kubi ba. A baa faabi ti leni laa nibuolu Hali yaa yogunu kuli,

⁹ Ba bi nibiadiba yaa goadi i kaani kuli, Ke ti cagindi mo yabidi bi niba siiga.