Pisomi 118 - U TIENU MAAMA TILI 2013

Pisomi 118 Pagi mani o Diedo o ninñingbadima leni o ŋanbili po

¹ Pagi mani o Diedo kelima o ŋani, O ŋanbili mo ye hali yaa yogunu kuli!

² Isidayeli yaaba mo n yaa tua: «O ŋanbili ye hali yaa yogunu kuli.»

³ Alono puoliŋuani n yaa tua: «O ŋanbili ye hali yaa yogunu kuli»

⁴ Yaaba n fangi o Diedo kuli n yaa tua: «O ŋanbili ye hali yaa yogunu kuli.»

⁵ N paboanli nni, n den jaandi ki mia o Diedo. O Diedo den gaa n jaandi, ki duani n yama.

⁶ O Diedo ye leni nni, mii jie liba kuli. Bi nisaaliba baa fidi ki tieni nni be?

⁷ O Diedo ye leni nni ki baa todi nni, Min le n yibalinba puoli.

⁸ N yaa sani ki baa o Diedo po, li ŋani ki cie, Min yaa dugi bi nisaaliba po.

⁹ N yaa sani ki baa o Diedo po, li ŋani ki cie, Min yaa dugi bi paatieba po.

¹⁰ I nilanbuoli kuli den lindi nni, Ama o Diedo yeli nni n den bolini ba.

¹¹ Bi den pini ki mundi nni, Ama o Diedo yeli nni n den bolini ba.

¹² Bi den poabini nni, Nani i naakpansii yeni, Ama bi den gbindi, Nani i konkoni mu yeni. O Diedo yeli nni, n den bolini ba.

¹³ Bi den pengi ki baa lu nni, Ama o Diedo den gaa nni.

¹⁴ O Diedo n tie n fidu leni n pamanli, Wani n tie n faabika.

¹⁵ Bi niteginkaaba gbandiena nni, Bi yigini li pamanli leni Mi faabima yigimi ki tua: «O Diedo nujienu tuuni leni u paalu!

¹⁶ O Diedo nujienu yuugi, Ki tuuni leni u paalu!»

¹⁷ N kan kpe, ama n baa yaa ye, Ki yaa togidi o Diedo bontienkaala.

¹⁸ O Diedo den tundi nni leni fala, Ama waa den ŋaa nni mi kuuma nuu nni.

¹⁹ Luodi mani n po mi teginma buliñoana, Ke min kua ki pagi o Diedo.

²⁰ Diidi o Diedo buliñoabu nne. Bi niteginkaaba kuli n kua lankani.

²¹ N baa pagi a kelima a gaa n jaandi, Ki tua n faabika.

²² Bi tanmaaba n den yie yaa tanli, Lini n tua li tanpuukaali.

²³ Laa bonla mo ñani o Diedo yaa kane, Ki tua bonlidinkaala ti nuni po.

²⁴ Diidi o Diedo n puni ti po yaa daali. Lin tua ti po jaanma leni pamanli daali.

²⁵ O Diedo, pa ti mi faabima! O Diedo, teni tin koani ki paadi!

²⁶ U Tienu n seligi yua n kpendi, Wani o Diedo yeli nni! Ti gaaliti yi, o Diedo diegu nni!

²⁷ Li Miali Diedo n tie U Tienu, Ki puuni ti mi yenma. Bogini mani ki yaa cuoni ki dia ki padiyanga, Ki muubi ti faadi yi nuu nni Ki cuani mani likuli hali li padibinbinli yina kani.

²⁸ Fini n tie n Tienu, n baa pagi fine! N Tienu, n baa yaa yiini ki pagi fine!

²⁹ Pagi mani o Diedo kelima o ŋani, O ŋanbili mo ye hali yaa yogunu kuli.