Pisomi 114 - U TIENU MAAMA TILI 2013

Pisomi 114 Mi ñama yanbu

¹ Isidayeli n den ñani Ejipiti yaa yogunu, Jakob buolu n den ñani ti nilanlandi siiga yaa yogunu,

² Juda den tua o Diedo kaangagidiŋamu, Ke Isidayeli mo tua o diema.

³ Mi ñincianma den laa ba ki fii ki sani, Jurden mo yaa kpenu den sudi ki guani puoli.

⁴ A juana den yugi ki ciini nani a petona, A joabila mo n yaa yugi ki ciini nani a pebila yeni.

⁵ Mi ñincianma, be n pia ŋa ke a tiini? Jurden kpenu, be n teni ke a sudi ki guani puoli?

⁶ Be n pia yinba a juana ke yi yugi Ki ciini nani a petona, Be n pia yinba a joabila mo, Ke yi yugi ki ciini nani a pebila yeni?

⁷ Fini ki tinga, Amo n yaa digibi o Diedo nintuali, Wani Jakob Tienu nintuali.

⁸ O yen lebidi ku tangu kun tua kpenu, Ki lebidi yaa tangu n juagi, Kuni mo n tua ñinbunli.