Pisomi 108 - U TIENU MAAMA TILI 2013

Pisomi 108 Mi paadima pagidi yanbu

¹ Bu yanbu. Davidi yanbu.

² U Tienu, n pali pa! N baa yiini, n baa yiini ki pagi a, Kelima lani n tie n kpiagidi.

³ Fundi mani, yinba n gogiditi, Ke n baa fundi u tiŋaafaanu.

⁴ O Diedo, n baa pagi a bi niba siiga, N baa yiini ki pagi a i nilanbuoli siiga,

⁵ Kelima a ŋanbili kpedi ki cie tanpoli, A moamoani mo pundi hali ti tawadi.

⁶ U Tienu, waani a yabinu tanpoli po, Teni a kpiagidi n yendi ki gbieni ki tinga kuli.

⁷ A buakaaba faabima po, Cua ki todi nni, Gaa n po n miabu!

⁸ U Tienu maadi o kaagagidiŋamu nni, Ki yedi: «N baa koani ki paadi! N baa boagidi Sikemi diema, Ki biigi Sukoti joaloangu.

⁹ Mini n die Galaadi diema, Mini n go die Manase diema moko. Efrayimi diema tie n kusancibinkaali. Juda diema mo n tie n badigbiamu.

¹⁰ Moabi diema tie n ñinwalitiagu. N luni n cacaagu mo Edomi diema po. N fii ki sedi Filisiti yaaba diema po Ki kuudi bu toabu kuudi.»

¹¹ Ŋme n baa todi nni min diedi u kaanpaalu? Ŋme n baa gedini nni hali Edomi po?

¹² Laa tie fini U Tienu, Fini yua n den luni ti, Kaa go ña leni ti toagola yeni ka?

¹³ Cua ki todi ti tin koani leni ti yibalinba, Kelima o nisaalo wani yaa todima Tie fanma bebe yo.

¹⁴ U Tienu todima po, Ti baa koani leni jama, Kelima wani n baa ŋmaa Ki midi midi ti yibalinba.