Pisomi 102 - U TIENU MAAMA TILI 2013

Pisomi 102 Yua n ye li paboanli nni jaandi

¹ O ninñinnilo cua ki jaandi ki mia o Diedo todima o paboanli yogunu.

² O Diedo, cengi n miabu, N bubula mo n pundi hali a kani!

³ Da buli nni a nunga n paboanli daali! Diadi a tubili ki cengi nni n bubula daali! Jaligi ki gaa n jaandi!

⁴ N miali dana pendi nani i muñii yeni, N kpaba mo co nani a mudatala yeni.

⁵ N pali tie nani ban ceni Yaa muadi ke ti kuodi yeni. N sundi ba mi jiema po.

⁶ N dunli teni ke n kpaba bebe n ji ñii.

⁷ N naani leni mi fanpienma nni kpenjanlondo, Ki tie nani ti diegbendi nni juuli yeni.

⁸ Mii goa, n tie nani yaa nuano N jagi o bebe li dieli yuli po yeni.

⁹ Daali kuli n yibalinba sugidi nni, Ki ñuadi nni ki taagi n yeli ki solini.

¹⁰ Mi fantanpienma n ji tua n jiema, N nunsiidi mo kali ki taani leni n bonñokaala.

¹¹ A yua nni ki luni hali foagima, Kelima a pabienli leni a pabiidili po.

¹² N miali dana tiini ki pendi Nani ku jinjingu, Ki kuodi nani ti muadi yeni.

¹³ Ama fini o Diedo, a tie bade yaa yogunu kuli, Fini n li tie U Tienu nifiima n tuu nifiima.

¹⁴ A baa fii ki gbadi Siyon dogu po mi ninñima, Kelima ŋan den bili ke a baa tieni u po Li ŋanbili yaa yogunu yeni pundi.

¹⁵ A naacenba bua Siyon dogu tana bonŋanla, Mi ninñima mo pia ba u diegbengu po.

¹⁶ Lanwani, i nilanbuoli kuli Baa yaa fangi o Diedo, Ki tinga badiba kuli mo N yaa kpiagidi o.

¹⁷ O Diedo baa guani ki maa Siyon, O baa doagidi o yuli o kpiagidi nni.

¹⁸ O baa cengi o ninñinnilo miabu, Ki gaa o miabu leni ki nunmanga.

¹⁹ Ban diani laa bonla ki bili Yaa nifiima n baa fii po, Ke ban baa yuandi ki maa yaaba mo N pagi o Diedo,

²⁰ Kelima hali tanpoli po, O diegagidikaali nni, O Diedo tibini ki baa le ki tinga,

²¹ Ki baa cengi a kpaada dunli, Ki faabi ban bili ke yaaba n baa kpe mo.

²² Lanwani, bi baa kpaani O Diedo yeli Siyon dogu nni, Ki yiini ki pagi o Jerusalemi dogu nni,

²³ I nibuoli leni mi diema kuli yaa taani, Ki baa kpiagi o Diedo yaa yogunu.

²⁴ Mi nuama siiga yo ke o wadi n fidu, Ki koabigi n miali dana.

²⁵ N den yedi: «N Tienu, da ñani n miali n panma siiga, Fini yua yaa bina n ki pia gbenma.»

²⁶ Hali yogu, a den puu ki tinga tanpuuli. Tanpoli mo tie a yaa tagime.

²⁷ Lani kuli baa bodi, ama fini wani baa yaa ye. Likuli baa cadi nani ti tiayiekaadi yeni, Ŋan lebidi la nani li liadili yeni. Lani kuli baa pendi ki bodi.

²⁸ Ama fini wani, a baa yaa tie yenma, A bina mo ki pia gbenma abada.

²⁹ A naacenba bila baa baa u yekaanu, Bi puoliŋuani mo n baa u paalu a nintuali.