Pisomi 101 - U TIENU MAAMA TILI 2013

O bado ñoaniani U Tienu po

1 Davidi yanbu.

¹ Davidi yanbu. Diidi, n baa yiini ki pagi Li ŋanbili leni yaala n dagidi tienma! O Diedo, n baa yiini ki kpiagi fine!

² N bua ki yaa suagi liiga li papienli nni. A baa cua n kani beyogune? N baa cuoni leni li papienli n diegu nni.

³ N kan mangi n pali leni yaala bia noanlima, N nani ti tuonbiadi danba tagi, N kan baa ŋantaadiba leni laa tagi.

⁴ N baa foagidi leni yua yaa pali n ki tiegi. N kan bandi yaala n bia mo.

⁵ Yua n biidi o lielo yeli ŋasiili nni, N baa bolini o. Yua n nua o lieba leni kafaama, Kan baa taasedikaali n nintuali.

⁶ N baa yaa faami mi diema niteginkaaba po, Ki teni ban yaa ye n kani. Yua n cuoni leni li papienli, Wani n baa yaa tuuni n po.

⁷ Yua n puni o yuli i janbi po, Kan yaa ye n nintuali. Yua n maadi leni i boandi, Kan fidi ki sedi n nintuali.

⁸ Tiŋaagu kuli n bolindi mi diema nibiadiba. Lani n tie min fidi ki ñani o Diedo diegu nni, Yaaba n tiendi yaala n ki tiegi kuli.