Pisomi 10 - U TIENU MAAMA TILI 2013

Pisomi 10

¹ O Diedo, be n teni ke a ban se foagima? Be n teni ke a wuoni li paboanli daali?

² Bi nibiadiba ŋua ki deli Bi ninñinniba leni ti japaadi. Bi baali ban jagi bi po yaa janbi nni.

³ O nibiado pagi o yuli leni wan jagi ki tieni yaala. O yaa tieni i janbi ki baa yaala, Se wan soli ki go ñuadi o Diedo.

⁴ O nibiado maadi leni ti japaadi ki tua: «Waa mabindi ba! Tienu ki ye!» O jaga kuli n yeni.

⁵ Wan jagi yaala kuli cuoni o po yogunu kuli. A buudi kpedi ki kandi ki kan nandi o. O puudi o koanginkaaba kuli.

⁶ O yedi o pali nni: «N kan ŋadi ki baa! Hali nifiima n tuu nifiima, Yebiadima kan ŋmaa nni!»

⁷ Solindi, boandi leni janbi bebe N gbie o ñoabu nni. Biadima leni mabinli bebe n ña bu niinni.

⁸ O yen wuo mu dobimu kani ki guu, Ki bua ki kpa yua n ki pia biili ŋasiili nni. O ŋua ki kpaagi o ninñinnilo.

⁹ O wuo ŋasiili nni nani O yangbanlo n yen wuo Ki bua ki cuo maama yeni. O wuo ki bua ki ludi o ninñinnilo. O yen ludi o ninñinnilo, Ki teni wan baa o taali nni.

¹⁰ O yen ñuani ki labini, Ki cuo bi ninñinniba.

¹¹ O tua o pali nni: «U Tienu sundi! O buli o nunga ki kan faami lipo abada.»

¹² Li Miali Diedo U Tienu, fii ki sedi! Da sundi bi ninñinniba po.

¹³ Be n teni ke o nibiado fali U Tienu? Be yaa po ke o maadi o pali nni ki tua: «O kan faligi i tagili po.»

¹⁴ Ama a nua taliga fala leni o duoli, Ki baa koani ki gaa o. O ninñinnilo dugi a yaa po yo. Fini n yen todi ki kpienbiga.

¹⁵ Kua o nibiado buagu, Waani o fala o biadima po, Ki teni wan bodi a nintuali.

¹⁶ O Diedo tie bado hali yaa yogu N tuu yaa yogu, Yaaba n ki ŋua U Tienu kuli, Baa bodi o diema nni.

¹⁷ O Diedo gba bi yumiindanba miabu, Ki cengi ba bonŋanla, ki paagi bi pala,

¹⁸ Ki jia yaa buudi n tiegi, Ki kpienbiga leni ban mabindi yua yaa po, Lani n tie o nisaalo yua ñani ki tinga nni N da go yaa jiendi bi niba.