Ose Tili 1 - U TIENU MAAMA TILI 2013

Ose diegu yema 1—3

¹ Li naa tili maama tie o Diedo n den maadi leni Beeri bijua, Ose yaama, Juda badiba Osiasi, Yotam, Ahasi leni Esekiasi bala yogunu leni Isidayeli diema bado Yoasi bijua Jeroboami bali yogunu.

Ose pua leni o bila

² O Diedo n den cili ki maadi leni Ose ki soani o o niba po maama nne. Wani o Diedo den yedi Ose: «Gedi ki ban taa puoconconli, ki maa a puoconconbila, kelima mi diema na niba ŋaa mini o Diedo, ki conbi leni i buli.»

³ Lanwani, Ose den gedi ki ban taa Dibilayim bisalo Gomeri. O den punbi ki mali o po bonjaga.

⁴ O Diedo den yedi Ose: «Yini ki biga yeni Yisireyeli, kelima li kan go waagi leni min baa waani Jehu puoliŋuani fala, kelima bi yaaja Jehu yeni n den wuli yaa nimiana soama Yisireyeli dogu nni po. N baa bolini Isidayeli diema bali.

⁵ Lanyogunu, n baa bolini Isidayeli yaaba toatieba paalu, Yisireyeli joaloangu nni.»

⁶ Gomeri didi go den punbi ki mali Ose po bonpuoga. O Diedo den yedi Ose: «Yini ki biga yeni Lo-Ruhama, lani n tie: “Ban ki bua yua,” kelima n kan go fidi ki waagi ki bua Isidayeli yaaba. N kan go tieni bi po sugili.

⁷ Ama n baa faabi Juda yaaba wani. Mini o Diedo, bi Tienu n baa faabi ba. N kan faabi ba leni a dabana, mu jugisiemu, bu toabu, i taami, bi leni bi tanjagiba ka.»

⁸ Gomeri n den babidi Lo-Ruhama, o go den punbi ki mali bonjaga.

⁹ O Diedo den yedi Ose: «Yini ki biga yeni Lo-Ami, lani n tie: “Baa tie n niba,” kelima yinba Isidayeli diema yaaba, yii go tie n niba, mini mo ki go tie yi po liba kuli.»