Nehemi 9 - U TIENU MAAMA TILI 2013

Isidayeli yaaba loli bu ñoabu ki mia bi tuonbiadi sugili

¹ Cilele yeni piilie n danaali, Isidayeli yaaba den taani ki baa loli bu ñoabu. Bi den yie li paboanli tiadi, ki wuli bi ba po mi tama.

² Bi den paadi leni bi nilanba ki cua ki sedi ki doagidi ki waani bani leni bi yaajanba tuonbiadi.

³ Ban den fii ki sedi, bi den cogi bi po o Diedo bi Tienu bali maama tili nni, hali kuditaa. Bi go den laabi ki doagidi ki wangi bi tuonbiadi ki miadi U Tienu sugili hali kuditaa.

⁴ Josue, Bani, Kadimieli, Sebania, Buni, Selebia, Bani leni Kenani den doni ki sedi Levi buolu sedikaanu po, ki kpaani ki mia o Diedo bi Tienu mi todima.

⁵ Lane Levi buolu yaaba Josue, Kadimieli, Bani, Hasabinia, Selebia, Hodiya, Sebania leni Petaya den yedi: «Fii mani! Pagi mani o Diedo yi Tienu yaa yogu n tuu yaa yogu.» Ti Diedo, nilo kuli n pagi a yeli yaali n pia ti kpiagidi, Yaali n cie seli leni pagidi kuli.

Nehemi jaandi

⁶ Fini bebe n tie o Diedo yua n tagi tanpoli Leni tanpoli yaa tanpoli, tanpoli toagola, Ki tinga leni yaala n ye ki niinni kuli, Mi ñincianma leni yaala n ye mi niinni kuli. A puuni laa bonla kuli li miali. Tanpoli toagola mo labindi a nintuali.

⁷ Fini o Diedo U Tienu n gandi Abalama. Fini n ñani o Uri, Kalide diema nni, Ki yini o Abalahama.

⁸ A den sua ke o pali tiegi a po. A den danli leni o ki niani o Ke a baa pa o puoliŋuani Kanana yaaba, Hititi yaaba, Amoriti yaaba, Perisiti yaaba, Jebusi yaaba Leni Giligasi yaaba diema kuli. A kuani a ñoanianu mo kelima a tiegi.

⁹ A den laa ti yaajanba fala Ejipiti nni, Ki go gbadi bi bubula mo mi Ñincianmoanma kani.

¹⁰ A den tieni mi bancianma leni li bonlidinkaala, Ki tuogi leni Faraon, o koanbala Leni o diema yaaba kuli, Kelima a bani ban den faligi ti yaajanba maama. Lanwani, a den doagidi a kpiagidi Nani ŋan doagidi ti maama dinla.

¹¹ A den boagidi mi ñincianma Isidayeli yaaba nintuali, Ke bi duodi ma taakuoma. A den luni yaaba n ŋua ki deli ba ku buoñuangu nni, Nani ban luni li tanli mi ñincianma nni maama yeni.

¹² A den gobidi ba u yensiinu leni ku tawaligu, Ku ñiagu mo leni yaa tawaligu n tie mu, ki yendi bi po bi sanu.

¹³ A den ñani tanpoli ki maadi leni ba Sinayi juali po. A den teni yaa ñoamabona n tiegi, Yaa bali maama n tie moamoani, Yaa tundi leni yaa mabilikaama n ŋani boncianla.

¹⁴ A den teni ke bi bandi a fuodima dagagidikaali Ki teni ke a naacemo Musa waani ba mi mabilikaama, I tundi leni li bali maama.

¹⁵ Mi koma n den cuo ba, A den ñani mi jiema tanpoli po ki puni ba. U ñuñuunu n den gbadi ba, A den ñani mi ñima ku tangu nni ki puni ba. A den teni ke bi gedi ki ban diedi ŋan den poli ke a baa pa ba yaa diema.

¹⁶ Ama ti yaajanba den tieni ti japaadi, Ki juagi bi tuli, baa den cengi a bali maama.

¹⁷ Bi den yie baa tuo ma, Ki sundi ŋan den tieni bi po yaa ŋanma. Bi den juagi bi tuli. Bi yiema nni, bi den gandi o yudaano, Ki baa guani ban den ye ti yonbidi nni naanpo. Ama fini, a tie yaa Tienu n puuni sugili, Ki juogidi ki gba mi ninñima, Ke a pali ki be tontoni, ki pia li ŋanbili mo. Lani yaa po, ŋaa den ŋaa ba,

¹⁸ Ba ban den duadi ki naabiga ki yedi: «Diidi ti Tienu yua n ñani ti Ejipiti diema nni!» Bi den tudi a po tudicianma.

¹⁹ Ama ba leni lani kuli, a ninñingbadicianma po, Ŋaa den ŋaa ba mi fanpienma nni. Yaa tawaligu n den wangi ba u sanu u yensiinu, Ki den fuadi ki ŋaa ba, Yaa tawaligu n den tie mu Ki yendi bi po bi sanu ku ñiagu mo, ki den fuadi ki ŋaa ba.

²⁰ A den puni ba a yantiaŋanli ke ban baa mi yanfuoma. Ŋaa den tuo ke manni poadi ba, A den puuni ba mi ñima ke bi ñu.

²¹ A den ye leni ba ki kubi ba mi fanpienma nni hali bina piinaa, Baa den luo liba kuli. Bi tiayiekaadi ki den cadi, Bi taana mo ki den moali.

²² A den teni ke bi paadi mi diema leni i nibuoli. A den boagidi ki puni ba yaa tinmu n kuu kuu ba. Bi den diedi Sihoni Hesibon bado diema leni Basan yaa bado Ogi diema.

²³ A teni ke bi puoliŋuani yabidi nani tanpoli ŋmabila yeni. A den kuani ba ŋan den yedi ke bi yaajanba baa diedi yaa diema niinni.

²⁴ Bi kua ki diedi ma, Ke a teni ke bi paadi Kanana yaaba, Ki taa ba ki tieni bi nuu nni, Bani, bi badiba leni likani nilanbuoli, Ke ban soani ba ban bua maama.

²⁵ Bi den diedi i bilini n lindi ki cebini yaa dogi, Mu tinŋanmu leni ti ŋalimandiedi, Ban gbiidi yaa caana leni i duventiidi, Olivie leni i tilondi boncianla. Bi den dini ki guo. Bi den gbengidi, Ki ye mi yemancianma nni, Kelima a ŋanbicianli po.

²⁶ Ama ba yeni, bi den fii ki fiini mi yiema a po. Bi den luni a bali maama, Bi den kpa a saawalipuaba yaaba n den tigini ba Ke ban guani a kani. Bi den tudi a po tudicianma.

²⁷ Lanwani, a den teni ke bi yibalinba paadi ba, ki waani ba fala. Bi fala yogunu, bi den mua ki mia ŋa Ke a mo den gbadi bi nialu hali tanpoli po. A ninñingbadicianma po, a den puni ba bi faabikaaba Ke bi faabi ba bi yibalinba nuu nni.

²⁸ Ban den baa mi faabima, Bi den guani ki cili ki tiendi yaala n bia a nintuali. Lanwani, a go den teni ke bi yibalinba paadi ba. Ama bi didi go den mua ki mia ŋa Ke a mo go den gbadi bi nialu hali tanpoli po. A ninñingbadicianma po, a den faabi ba ke maa wa.

²⁹ A den tigini ba ban guani ki kubi a bali maama, Ama bi den suagi liiga leni ti japaadi. Baa cengi a mabilikaama, Ki miidi a ñoamabona ya n teni ke yua n tuo ki kubi a, baa yaa ye. Bi den fiini mi yiema ki juagi bi tuli, kaa tuo a maama.

³⁰ A den juuni leni ba hali yaa bina n yabi. A saawalipuaba yaaba n den gbie leni a Fuoma den tundi ba. Ama baa den cengi. Lanwani, a den taa ba ki tieni bi nilanba nuu nni.

³¹ Ama a ninñingbadicianma po, ŋaa den bolini ba, Ŋaa den ŋaa ba, Kelima a tie yaa Tienu n juogidi, ki gba mi ninñima.

³² U Tienu, ti Tienu, fini yua n yabi ki pia u paalu leni i jeje, Fini yua n kubi ŋan den kuani yaa ŋantaado Leni ti ki gba mi ninñima, Ŋan da fali tin laa yaa fala kuli, Tinba leni ti badiba, ti yudanba, ti kopadicianba, Ti saawalipuaba, ti yaajanba leni a niba kuli, Ki cili Asiiri badiba yogunu, Ki taa ki pundi hali dinla.

³³ Yaala n den tieni ti kuli siiga, a den tiegi Kelima a den doagidi ke a tie tin baa fidi ki dugi yua yaa po, Ke timo nan tieni yaala n bia.

³⁴ Ti badiba, ti yudanba, ti kopadicianba leni ti yaajanba Naa den kubi a bali maama. Bi den fali a mabilikaama leni a tundi.

³⁵ Ban den ye ŋan puni ba yaa diecianŋanma nni Leni ŋan den puni ba yaa bonŋanla kuli siiga, Baa den ŋaa bi tuonjoagima, ki soani a po.

³⁶ Dinla tinba n nan kaa ti yonbidi nne! Ti tie yonbi ŋan den puni ti yaajanba yaa tinga nni, Ke ban yaa di ki bonluonkaala leni ki piama.

³⁷ Tin tieni yaa tuonbiadi yeni po, A teni ke ki tinga yeni luoni boncianla, Ŋan den teni ke yaa badiba n die ti yeni po. Bi die tinba leni ti yandi kuli, nani ban bua maama. Ti ye leni paboancianli!