Nehemi 6 - U TIENU MAAMA TILI 2013

Yibalinba go fii Nehemi po

¹ Hali ke n daa caani ti buliñoaluoditi, Sanbala, Tobiya, Gesem Arabi yua leni ti yibalinba yaaba n sieni, den gbadi ke n guani ki maa u dogu bilinu, ke bonli ki go ye.

² Lanwani, Sanbala leni Gesem den soani ke bi yedi nni: «Cua ne tin le tiyaba Kefirimi dogu nni, Ono joaloangu nni.» Bi den jagi ke bi baa tieni nni yaala n bia.

³ N den soani a tonda ke bi ban yedi ba: «N pia tuoncianli ki baa soani, n kan fidi ki cua. N yaa ŋaa li tuonli ki cua, li baa sedi.»

⁴ Bi den yini nni yeni hali taaliminaa. Nmo den guani bi po maguankayenma.

⁵ Mi taamuuma, Sanbala den soani n kani o naacemo ke o kubi yaa tili n ki lo.

⁶ Li tili yeni niinni, li den diani: «Mi maama yadi i nilanbuoli siiga ke fini leni a Jufilieba jagi yin fiini mi yiema. Li tie lani yaa po yo ke yi guani ki maa u bilinu. Bi tua ke fini n baa tua bi bado. Gasimu moko yedi yene.

⁷ Bi tua ba ke a gandi bi saawalipuaba yaaba n baa waani Jerusalemi nni ke a tua Juda bado. Moala, lani kuli baa pundi o bado kani. Lanwani, cua ne tin taani ki juogi.»

⁸ N den teni ke bi yedi o: «Ŋan yedi yaala yeni tie faama. Fini n naani a cii.»

⁹ Laa niba kuli den bua ki jieni ti. Bi den tama ke ti gbani baa wudi, tin cedi li tuonli. «Moala, n Tienu, ŋan pugini nni u fidu.»

¹⁰ N den gedi Delaya bijua Semaya, wani Mehetabeeli yaabili po, kelima waa den fidi ki ñani o deni. O den yedi nni: «Tin gedi U Tienu diegu po ki ban kua u kaangagidiŋamu nni, ki luoni ku diegu buliñoana, kelima a yibalinba baa cua ku ñiagu ke bi baa kpa ŋa.»

¹¹ N den guani ki yedi: «Mii tie yaa nibuolu n baa sani! N buolu ne baa fidi ki kua u kaangagidiŋamu nni ki yaa ye? N kan kua.»

¹² N den bandi ke laa tie U Tienu n soani o. O den maadi nni laa maama, kelima Sanbala leni Tobiya den suu o i ligi.

¹³ Bi den suu o i ligi ki tama ke n baa jie, ke n baa tuo o tundi ki tieni ti tuonbiadi. Lanwani, bi den baa baa ki biidi n yeli ki fiagi nni.

¹⁴ «N Tienu, ŋan tiadi Tobiya, Sanbala leni bi tuona po. Ŋan go tiadi o saawalipualo yua n tie pua, ki yi Noadia leni bi saawalipuaba yaaba n sieni po, bani yaaba n den lingi ki baa jieni nni.»

¹⁵ U bilinu yeni den gbeni yaa ŋmaalo n yi Eluli piilie n damuuli daali, piimuu n danalie siiga.

¹⁶ Ti yibalinba n den gbadi, yaa diema n den lindi ti kuli den jie boncianla ki tuo ke li tuonli den soani, kelima U Tienu yanbuama po.

¹⁷ Laa dana siiga, li den pia Juda paatieba yaaba n dangi a tila ki tuuni Tobiya po, ki go gaani o ya mo.

¹⁸ Juda diema nni bi niba boncianla den tuugi leni o, kelima o den tie Ara bijua Sekania cuado, ke o bijua Yohanani mo den taa Berekia bijua Mesulami bisalo.

¹⁹ Bi den pagi o n nintuali mo, ki caa ki ban togidi o min maadi yaala. Tobiya den tuuni a tila ki bua ki jieni nni.