Nehemi 5 - U TIENU MAAMA TILI 2013

Nehemi gbeni mi biadima Jufinba siiga

¹ Bi jaba leni bi puoba den yenbidi boncianla bi Jufilieba po.

² Bi nitianba den tua: «Tinba, ti bijaba leni ti bisiaba, ti yabi. Ban pa ti ŋalikama tin yaa di ki ye.»

³ Bine den tua: «Ti tendi ti kuani, ti duventiidi leni ti diedi ki fidi ki baadi ŋalikama mi koma yogunu.»

⁴ Toaba mo den tua: «Ti ledi i ligi ki dugi ti kuani leni ti duventiidi po, ki baa pa o bado li lubili.

⁵ Ama tikuli taa buolu. Ti bila tie nani bi bila yeni. Ti teni ke ti bila kua ti yonbidi nni. Ti bisiaba boncianla kua ti yonbidi yeni niinni no. Tii pia kuli tin baa tieni maama, kelima ti kuani leni ti duventiidi kuli tie nitoaba yaala.»

⁶ Min den gbadi bi yenbidi leni laa maama kuli, n pali den beni hali boncianla.

⁷ N den jagi ke n baa fu leni bi paatieba leni li bali danba. N den yedi ba: «Yi tungi yi lieba be yaa tugikpiaga nne?» N den yini ki taani bi niba.

⁸ N den yedi ba: «Ti den guani ki daa ki faabi ti kpiiba Jufinba nani tin fidi maama, ban den kuadi yaaba bi nilanba po. Moala, yinba yi ba mo n nan ji kuadi ba ti buolu po!» Bi den ŋmini, kelima baa den pia ban baa guani yaala.

⁹ Lanwani, n den yedi ba: «Yin tiendi yaala yeni ki ŋani. Yii bi baa yaa cuoni leni U Tienu fangili ka ke ti yibalinba bi nilanba n da sugi ti?

¹⁰ Mini moko, n ledi ba i ligi leni ŋalikama, nani n kpiiba leni n naacenba yeni. Tin cedi ban da pa ban kubi ti po yaala.

¹¹ Dinla yin guani ki teni ba bi kuani, bi duventiidi, bi olivie tiidi leni bi diena. Yin cabi ba yin den ledi ba yaa ligi, yaa ŋalikama, yaa duven leni yaa kpama, ki baa ti guani ki gaa leni yaa ñuadi.»

¹² Bi den guani ki yedi: «Ti baa tieni ŋan yedi yaala. Ti baa guani ba tin gaa yaala, ti kan buali ba puu kuli mo.» Lanwani, n den yini bi kopadicianba ki teni ke bi pandanba poli bi nintuali, ke bi baa tieni ban yedi yaala.

¹³ Lanwani, n den yogi yogi n liadicianli ki yedi: «U Tienu n yogi yaaba n kan tieni ban yedi yaala nanda. Wan teni ban luo bi diedi leni bi bonpiakaala, ki da pia puu kuli!» Li nitaanli den yedi: «Amina!» Bikuli den pagi o Diedo. Bi niba den tieni ban yedi yaala.

¹⁴ Hali o bado n den dini nni li bali yaa daali ke n tua guveneeri Juda diema nni, ki cili o bado Aritakiselisesi bali binpiiliedi binli, ki yaa caa hali o piitaa n binlieli, lani n tie piiga n binalie, mini, bi n kpiiba, oba ki den gaani guveneeri n yen gaani yaa lubili.

¹⁵ Min ŋoadi yaa guveneerinba puoli den coagini bi niba ki gaani bi kani mi jiema leni duven, kaa taa leni a kujapienpiinaada. Ba bi naacenbaanba den wangi bi niba fala. Ama mini, mii tieni yeni kelima n fangi U Tienu.

¹⁶ N go den soani u bilinu guanimaama tuonli mo. Tii daa kuanuba, n naacenba mo kuli taa ki tuuni u bilinu yeni tuonli.

¹⁷ N den dindi niba kobiga n piimuu, Jufinba leni yaaba n tie bi siiga li bali danba, kaa taa leni yaaba n den ña yaa nilanbuoli n lindi ti ki kpendi.

¹⁸ Daali kuli bi yen kodi naatonyenli, pegandikeluoba leni ti bonyugiditi. Likuli den tie n yaa tugili. Dana piiga siiga kuli mo, bi yen ŋanbi duven boncianla. Ba yeni, mii den buali guveneeri n yen gaani yaa lubili, kelima a tuona den tie bi niba po tugikpiagili.

¹⁹ «N Tienu, ŋan tiadi n po kelima min tieni bi naa niba po yaala, ki ŋanbi n po.»