Nehemi 4 - U TIENU MAAMA TILI 2013

¹ Ama Sanbala, Tobiya, Arabi, Anmoni leni Asidodi dogu yaaba n den gbadi ke Jerusalemi bilini ŋanbima tuonli cuoni bonŋanla, ke a bona kuli cili ki biindi, bi pala den beni boncianla.

² Bikuli den juogi ki taani ñoabu ki baa cua ki baa Jerusalemi, ki baa ban baa biidi yaala.

³ Lanwani, ti den mia ti Tienu, ki go guuni bi niba u yensiinu leni ku ñiagu kuli, ke bi yaa ti baa ti, tin moa ki gaa ti yula.

⁴ Ama Juda buolu den tua: «Bi tuonsoanba gbanmanu gbeni, a tangbana mo yabi. Ti kan fidi ki maa u bilinu.»

⁵ Ti yibalinba mo den tua: «Bi kan bandi puu, bi kan le puu hali tin baa n kua bi siiga ki kpa ba, ki teni li tuonli n sedi.»

⁶ Yaa Jufinba n den ye yaa dogi n nagi leni ti yibalinba yeni den cua taalima piiga, ki tuodi ki waani ti, bani ti yibalinba yeni n jagi ke bi baa tieni ti yaala kuli.

⁷ Lani yaa po, n den sieni bi niba yaa kaani n ñua ki pia u kaanpaalu u bilinu puoli po. Bi den taa ki ye likani buolu buolu, ke yuakuli kubi o jugisiega, o kpaanli leni o dabanli.

⁸ N den diidi diidi ki fii ki yedi bi paatieba, li bali danba leni yaa niba n sieni kuli: «Yin da jie mani yi yibalinba. Tiadi mani o Diedo yua n yabi ki pia i jeje po, ki koani mani yi kpiiba po, yi bijaba, yi bisiaba, yi puoba leni yi diedi nni yaaba kuli po.»

⁹ Ti yibalinba den gbadi ke bi tuodi ki waani ti bi yanjagibiadili. U Tienu den bolini bi cili. Lanwani, tikuli den guani ki tuuni u bilinu kani, yuakuli leni o yaa tuonli.

¹⁰ Hali landaali, n naacenba siiga boagidima den tuuni, ke boagidima mo kubi a kpaana, a gbankoanditi leni a dabana, ki la ti kudi liada. Bi yudanba mo den se Juda yaaba kuli puoli.

¹¹ Yaaba n den maa u bilinu leni yaaba n den tugi a tuga leni yaaba n den tungi ba, yuakuli den tuuni leni nuyendu, ke u lielu mo kubi o toatiagu.

¹² Yuakuli den tuuni yeni ki go yie o jugisiega. Yua n den piebi li naatuntunli mo den se n kani.

¹³ N den yedi bi paatieba, li bali danba leni yaa niba n sieni kuli: «Li tuonli yabi. Ti go yadi yadi ki lindi u bilinu ki foagi leni tiyaba.

¹⁴ Bi yaa piebi li naatuntunli, yin taani mani ti kani yin gbadi ke bi piebi naanpo. Ti Tienu baa koani ti po.»

¹⁵ Ti den tuuni li tuonli yene, ti siiga nni boagidima yuakuli den kubi o kpaanli, ki cili ku tiŋaapanpangu ki yaa caa hali ku ñiagu.

¹⁶ Lanyogunu n go den maadi leni bi niba kuli ki yedi ba: «Nilo kuli n yaa dua Jerusalemi nni, wani leni o naacemo. Tin yaa guu ku ñiagu ki tuuni u yensiinu.»

¹⁷ Tii den landi ti tiadi, mini leni n kpiiba, n naacenba leni yaa guudikaaba n den yegi leni nni kuli. Nilo kuli den kubi o toatiagu leni mi ñima bebe.