Nehemi 3 - U TIENU MAAMA TILI 2013

Jufinba guani ki ŋanbi Jerusalemi bilini

¹ Bi kopadicianba bado Eliasibi den fii, ke wani leni o kpiiba bi kopadicianba den maa i Pe Buliñoabu. Bi den gagidi bu U Tienu po, ki caani ti buliñoaluoditi. Bi den ŋanbi u bilinu ki pundi hali Meya Diefoagili, ki yaa caa hali Hananeeli Diefoagili.

² Jeriko yaaba leni Imiri bijua Sakuri den maa ki tugini Eliasibi kani.

³ Sena bijaba den maa i Jami Buliñoabu. Bi den yoagini bu, ki caani ti buliñoaluoditi, ki tieni li bonluonkaala leni yaa daadi n poandi, ki luondi.

⁴ Uri bijua Hakotisi, wani Meremoti yaabili den maa ki tugini bi kani. Berekia bijua Mesulami, wani Mesesabeeli yaabili leni Baana bijua Sadoki mo den maa ki tugini lankani.

⁵ Tekoa dogu yaaba mo den ŋoadi bani ki maa. Ama u dogu yudanba den yie ke li tuonli yudanba kan gobidi ba ban soani.

⁶ Pasea bijua Yoyada leni Besodia bijua Mesulami den guani ki maa yaa buliñoabu n yi bu Buliñoakpelibu. Bi den pini bu ki caani ti buliñoaluoditi, ki tieni li bonluonkaala leni yaa daadi n poandi, ki luondi.

⁷ Gabaon yua Melatia, Melonoti yua Yadon, jatoaba yaaba n ñani Gabaon leni Misipa, yaaba n ñani u kpenciamu nintuali dociamu, den maa ki tugini bi kani.

⁸ O maano Usieli, Hadaja bijua den maa ki tugini bi kani. Hanania, yua n ŋanbidi tulale mo den maa ki tugini o yaa kani. Ban den maa ki pundi u bilinu n piagi naani yeni, bi tuonli den gbeni Jerusalemi.

⁹ Jerusalemi dogu boagidima yudaano Refaya, Huri bijua den maa ki tugini bi yaa kani.

¹⁰ Halumafi bijua Yedaya den maa ki tugini bi kani ki tiegi o diegu. Hasabinia bijua Hatusi mo den maa ki tugini o yaa kani.

¹¹ Harim bijua Malikiya leni Pahati-Moabi bijua Hasubi den maa bilinjenyenli leni mu Buamu Diefoagili.

¹² Jerusalemi dogu boagidima yudaano Salumi, Halosesi bijua, den maa ki tugini bi kani, wani leni o bisiaba.

¹³ Hanuni leni Sanoa dogu yaaba den maa yaa buliñoabu n yi ku Joaloangu Buliñoabu. Bi den maa bu ki caani ti buliñoaluoditi, ki tieni li bonluonkaala leni yaa daadi n poandi, ki luondi. Bi go den ŋanbi u bilinu nukpanduna tudili, ki ban pundi hali ti Bugidi Buliñoabu.

¹⁴ Beti-Hakelemi dogu yudaano Malikiya, Rekabi bijua den maa ti Bugidi Buliñoabu. O den maa bu ki caani ti buliñoaluoditi, ki tieni li bonluonkaala leni yaa daadi n poandi, ki luondi.

¹⁵ Misipa dogu yudaano Salumi, Koli-Hose bijua den maa li ñinbunli Buliñoabu. O den maa bu ki pini bu, ki caani ti buliñoaluoditi, ki tieni li bonluonkaala leni yaa daadi n poandi, ki luondi. O den guani ki ŋanbi yaa bilinu n kuu leni Silowe boangu, o bado salidinga leni Davidi dogu ŋmaadokaani siiga.

¹⁶ Asibuki bijua Nehemi, yua n den tie Beti-Suri dogu boagidima yudaano, den maa ki tugini o yaa kani ki ban pundi hali Davidi takula nintuali, hali ban den gbiidi yaa boangu kani, ki ban pundi hali o bado guudikaaba diegu kani.

¹⁷ Levi buolu den maa ki tugini o kani: Bani bijua Rehum leni Keyila dogu boagidima yudaano Hasabia yua n den soani o dogu po

¹⁸ leni Keyila dogu boagidima yudaano Bafayi, Henadadi bijua

¹⁹ leni Josue bijua Eseli Misipa dogu yudaano yua n den maa bilinjentoali ki tiegi ti toatiadi ŋmaadokaanu, i bilini logidima kani.

²⁰ Sabayi bijua Baruki den fiini o gbanu ki maa bilinjentoali ki tugini o yaa kani, ki cili i bilini logidima kani, ki ban dagini bi kopadicianba bado Eliasibi diegu.

²¹ Hakotisi bijua Uri bijua Meremoti den maa bilinjentoali ki cili Eliasibi diegu buliñoabu kani, ki ban dagini ku diegu yeni bianu.

²² Yaa kopadicianba n kaa ki kuu Jerusalemi den tugini o kani ki maa.

²³ Bi yaa puoli, Benjamen leni Hasubi den maa bilinjenyenli ki kuu bi diedi. Maaseya bijua Asariya, wani Anania yaabili den maa ki tugini bi kani, ki kuu o diegu.

²⁴ O puoli po, Henadadi bijua Binuyi den maa bilinjentoali, ki cili Asariya diegu kani ki ban pundi hali i bilini logidima kani.

²⁵ Usayi bijua Palali den maa ki tiegi i bilini logidima kani, yaa diefoagili n kpedi ki cie, ki ye o bado diegu nintuali, ki kuu li kpaadidieli luolu. Pareyosi bijua Pedaya den maa ki tugini o kani.

²⁶ U Tienu diegu naacenba yaaba n den ye Ofeli Ñianjaali, ki juaga po, den maa ki ban pundi hali yaa diefoagili n tuugi leni u bilinu, ki ye mi Ñima Buliñoabu puoli po.

²⁷ Bi yaa puoli, Tekoa dogu yaaba den maa bilinjentoali ki tiegi yaa diefoagicianli n tuugi leni u bilinu, ki ban pundi hali Ofeli bilinu kani.

²⁸ Ki cili i Taami Buliñoabu kani, bi kopadicianba den maa ke yuakuli tiegi o diegu.

²⁹ Imeri bijua Sadoki den tugini bi kani ki maa o diegu nintuali kani. Puoli po yaa buliñoaguudo Sekania bijua Semaya den tugini o yaa kani ki maa.

³⁰ Selemia bijua Hanania leni Tisalafi bijaluobilo Hanuni den maa bilinjentoali ki tugini bi kani. Berekia bijua Mesulami mo den maa ki tugini bi yaa kani, ki tiegi o dieli.

³¹ O maano Malikiya den maa ki tugini o kani ki ban pundi hali U Tienu diegu naacenba leni a kpenda diedi kani, ki tiegi Mifikodi Buliñoabu, ki go ban pundi hali ki logidiga tanpodieli.

³² Bi maaba leni a kpenda den maa ki logidiga tanpodieli leni i Pe Buliñoabu siiga.

Li tuonli suagi liiga ba ke yibalinba bua ki sieni li

³³ Sanbala n den gbadi ke tinba Jufinba guani ki maa u bilinu, o pali den fii ki beni hali boncianla, ke o ñuadi ti

³⁴ ki yedi o kpiiba leni Samari toatieba nintuali: «Mu Jufijanjadinmu mo tuuni be yo? Ti baa cedi ban yaa tuuni bi? Bi baa baa ki padi bi? Naani bi baa soani ki gbeni dinla bi? U mu n juu yaa tana ke a tangbana dogini ki piini a, bi go baa faadi a bi?»

³⁵ Anmoni buolu yua Tobiya den ye o kani. O den yedi: «Ban yaa maa be! Ba colo yaa doni ban maa yaa bilinu leni a tana yeni po, o baa lu u.»

³⁶ N den yaadi ki yedi: «Ti Tienu, a gbadi ban fali ti maama. Teni bi sugidi n guani ki jiidi bi po. Teni ban fie bi bonpiakaala ki gedini ba ti yonbidi.

³⁷ Da tieni bi po sugili bi tuonbiadi po, da sundi bi tagili po, kelima bi sugi tinba yaaba n maa u bilinu.»

³⁸ Ti den guani ki maa u bilinu yeni. Ti den maa ki gbeni i kaani kuli ki ban pundi u kpedima boagidima, kelima yuakuli den kuani o yama li tuonli yeni niinni bonŋanla.