Nehemi 2 - U TIENU MAAMA TILI 2013

Nehemi baa u sanu ki baa guani Jerusalemi

¹ O bado Aritakiselisesi bali binpiiliedi binli, yaa ŋmaalo n yi Nisan yaa niinni, duven den se wani o bado nintuali, ke n taa duven yeni ki teni o. N pali daa den kpa biidi o kani nani landaali.

² O bado den yedi nni: «Be n teni ke a nunga biidi nanda? A naa yia wani. Li baa li tie paboanli bebe lige.» Ti jawaanciandi den cuo nni,

³ ama n den guani ki yedi wani o bado: «Fini o bado n yaa ye ki fo hali yaa yogunu kuli. N nunga baa gaa lede ki kan biidi n baanba takula n ye yaa dogu nni yaa bodi, ke u mu dini u bilinciamu buliñoana?»

⁴ O bado den yedi nni: «A bua be?» N den jaandi ki mia U Tienu yua n die tanpoli,

⁵ ki guani ki yedi o bado: «Li yaa mani fini o bado, ke a pali mo mani mini a naacemo po, ŋan pa nni u sanu min gedi Juda diema po, n baanba takula n ye yaa dogu nni ki ban guani ki maa u.»

⁶ Li den sua ke o bado pua kaa o kani. O bado den buali nni: «A cenli baa waagi ki pundi hali beyogunu? A baa guani ki kpeni u laa yogunu?» O bado den tuo min gedi. N den bili o min baa guani ki kpeni yaa yogunu.

⁷ Lanwani, n go den mia o bado ki yedi o: «Li yaa mani fini o bado, ŋan teni nni a tila yaa guveneerinba n die u kpenciamu Efrati nintuali po, ban cedi min poandi bi diema nni ki gedi Juda.

⁸ Ŋan go teni nni li tili Asafi po, yua n tie fini o bado fuaguudo, wan teni nni yaa daadi n baa dagidi yaa toaguudidieli n nagi U Tienu diegu kani yaa buliñoana po, u dogu bilinciamu po leni min baa yaa ye yaa diegu nni po.» O bado den tuo ki teni nni laa tila, kelima n Tienu nuu, yuu n ŋani, den maa n po ki kubi nni.

⁹ O bado den teni ke bi toatieba yudanba leni bi tandanba ciani nni. N den gedi yaa guveneerinba n die u kpenciamu Efrati nintuali, ki teni ba o bado tila.

¹⁰ Horoni yua Sanbala leni o duogili Tobiya, Anmoni buolu yua, n den gbadi ke n cua, li den biidi bi pala boncianla ke o nilo cua ki baa lingi Isidayeli yaaba ŋamu.

Nehemi gaani ki goandi Jerusalemi bilini n tie maama

¹¹ N den pundi Jerusalemi ki tieni likani danataa.

¹² Li yaa puoli, n den fii ku ñiagu mini leni bi nitianba. N daa den waani niloba kuli n Tienu n kuani yaala n pali nni, ke min tieni Jerusalemi po. Min den jagi yaa ŋunbo yaa ka, yantoaga kuli ki den ye leni nni.

¹³ Ku ñiagu, n den tagini u bilinciamu buliñoabu, ku Joaloangu Buliñoabu kani, ki ñani u dogu nni, ki teli o bonfuodibiado Ñinbunli leni ti Bugidi Buliñoabu. N den diidi Jerusalemi bilinciami yii n mudi mudi leni u buliñoana, u mu n den dini ya.

¹⁴ N go den suagi liiga ki balini u dogu bilinciamu buliñoabu yaabu n yi li Ñinbunli Buliñoabu leni yaa boangu n yi o bado Boangu kani. Ama sanu ki den ye n bonjaginkaala n baa tagi naani.

¹⁵ Lani yaa po, ku ñiagu yeni n den doni u kpenu, ki go diidi u dogu bilinciamu. N den guani ki kua u dogu bilinciamu buliñoabu yaabu n yi ku Joaloangu Buliñoabu kani, ki kuni.

¹⁶ Li bali danba ki den bani min gedi naankani leni min tiendi yaala. Hali lanyogunu, n daa den yedi liba Jufinba, bi kopadicianba, bi paatieba, li bali danba, bi yaaba n baa yaa tuuni laa tuonli siiga nni ba niyendo.

¹⁷ Ama n den yedi ba: «Yi laa tin ye leni yaa falaciamo. Jerusalemi mudi mudi, u mu buoni o buliñoana. Cua mani tin guani ki maa Jerusalemi bilinciamu ke tin da go ye leni i fe.»

¹⁸ Lanwani, n den togidi ba U Tienu nuu, yuu n ŋani n den maa n po ki kubi nni maama leni o bado n den maadi nni yaa maama. Bi den yedi: «Tin fii ki maa mani!» Bi den paagi bi pala ki baa tieni laa yanjagiŋanli.

¹⁹ Horoni yua Sanbala, o duogili Tobiya Anmoni buolu yua leni Gesem Arabi buolu yua, n den gbadi tin jagi yaala, bi den ñuadi ti ki fali ti, ki yedi: «Yi tiendi be nne? Yi bua ki fiini o bado po mi janjanma yo?»

²⁰ N den guani ba yaa maama n tie ne: «U Tienu yua n die tanpoli baa teni tin tuuni yaa tuonli n juodi bonŋanla. Tinba o naacenba, ti baa fii ki maa. Ama yinba, yii pia biinu, yii pia sanuba Jerusalemi ne niinni. Bi kan tiadi yi po lienni mo.»