Nehemi 11 - U TIENU MAAMA TILI 2013

Yaa Jufinba n guani ki kali Jerusalemi

¹ Isidayeli yaaba yudanba den kali Jerusalemi. Yaaba n sieni den toani tiatia ke niba piiga siiga niyendo n cua ki yaa ye Jerusalemi u dogagidiko nni, ke yaaba n sieni mo n yaa ye yaa dogi n sieni nni.

² Bi niba den gaali yaaba n tuo bi yama po ke bi baa yaa ye Jerusalemi kuli.

³ Yaa dogi n sieni niinni, Isidayeli yaaba, yaaba n sieni, bi kopadicianba, Levi buolu, U Tienu diegu naacenba leni Salomon naacenba yaaba den kaa bi tincele nni, yuakuli o dogu nni. Juda diema yudanba den ye Jerusalemi.

⁴ Juda buolu leni Benjamen buolu, bi tianba den kali Jerusalemi. Juda buolu, yaaba n den kali nne: Ataya, yua n den tie Peretisi yaabili. Peretisi den mali Malaleeli, Malaleeli n maa Sefatia, Sefatia n maa Amaria, Amaria n maa Sakari, Sakari n maa Osiasi, Osiasi mo n maa wani Ataya.

⁵ Juda buolu yua, yua n go den kali nne: Maaseya yua n den tie Siloni yaabili. Siloni den mali Sakari, Sakari n maa Joyalibi, Joyalibi n maa Adaya, Adaya n maa Hasaja, Hasaja n maa Koli-Hose, Koli-Hose n maa Baruki, Baruki mo n maa wani Maaseya.

⁶ Peretisi cuuli, yaaba n den kali Jerusalemi kuli den taani ki tie kobinaa n piiluoba n jakoandanii.

⁷ Benjamen buolu, yaaba n den kali nne: Salu, yua n den tie Esayi yaabili. Esayi den mali Itieli, Itieli n maa Maaseya, Maaseya n maa Kolaja, Kolaja n maa Pedaya, Pedaya n maa Joyedi, Joyedi n maa Mesulami, Mesulami mo n maa wani Salu.

⁸ O yaa puoli, li go den pia Gabayi leni Salayi. Bikuli den tie kobiyia n piilie n nibinii.

⁹ Sikiri bijua Joeli den tie bi yudaano. Senua bijua Juda mo den tie u dogu yudaano duogili.

¹⁰ Bi kopadicianba siiga yaaba n den kali Jerusalemi den tie: Joyalibi bijua Yedaya leni Jakini,

¹¹ Seraya, yua n den tie U Tienu diegu kopadicianba bado Ahitubi yaabili. Ahitubi den mali Melajoti, Melajoti n maa Sadoki, Sadoki n maa Mesulami, Mesulami n maa Hilikiya, Hilikiya mo n maa wani Seraya.

¹² Li den tie bani leni bi lieba, kobinii n piilie n bilie, yaaba n den tuuni U Tienu diegu nni. Li go den pia Malikiya yaabili Adaya. Malikiya den mali Pasehuri, Pasehuri n maa Sakari, Sakari n maa Amitisi, Amitisi n maa Pelalia, Pelalia n maa Jelokami, Jelokami mo n maa wani Adaja.

¹³ O yaa puoli li go den pia diedanba kobilie n piinaa n bilie, yaaba n tie o kpiiba leni Imeri yaabili Amasisayi. Imeri den mali Mesilemoti, Mesilemoti n maa Akisayi, Akisayi n maa Asareeli, Asareeli mo n maa wani Amasisayi.

¹⁴ Li den tie bani leni bi lieba, kobiga n piilie n jakoandanii. Gedolimi bijua Sabidieli n den tie bi yudaano.

¹⁵ Levi buolu siiga yaaba n den kali Jerusalemi den tie: Buni yaabili Semaya. Buni den mali Hasabia, Hasabia n maa Asirikami, Asirikami n maa Hasubi, Hasubi mo n maa wani Semaya.

¹⁶ Li den tie wani leni Sabetayi leni Josabadi, yaaba n den tie Levi buolu siiga yudanba, ki die U Tienu diegu niinpo tuona maama.

¹⁷ Asafi yaabili Matania. Asafi den mali Sabidi, Sabidi n maa Mise, Mise n maa wani Matania, yua n den gobidi ti pagidi yani mi jaanma yogunu. Bakibukia, o kpiiba siiga yua n den gobidi ki todi o leni Jedutuni yaabili Abida. Jedutuni den mali Galali, Galali n maa Samua, Samua n maa wani Abida.

¹⁸ Levi buolu, yaaba n den ye u dogagidiko kuli nni taanma den tie kobilie n piinii n nibinaa.

¹⁹ A buliñoaguuda mo den tie Akubi, Talimoni leni bi buliñoaguudilieba. Bikuli den taani ki tie kobiga n piilele n nibilie.

²⁰ Isidayeli yaaba, yaaba n sieni, bi kopadicianba leni Levi buolu den kali kali Juda dogi nni kuli, yuakuli o tincele nni.

²¹ U Tienu diegu naacenba den kali Ofeli ñianli. Bi yudanba den tie Tisisa leni Gisipa.

²² Yua n den tie Levi buolu yudaano Jerusalemi dogu nni, den tie Mise yaabili Usi. Mise den mali Matania, Matania n maa Hasabia, Hasabia n maa Bani, Bani mo n maa wani Usi. O den tie Asafi cuuli yua, yaaba n den die i yani maama U Tienu diegu nni.

²³ O bado den ñani li ñoamabonli bi yanyinba po ki go bili bi panpaani daali kuli po.

²⁴ Juda buolu yua Salaki yaabili Mesesabeeli bijua Petaya den ye o bado diegu nni, ki tuuni yaala n tie Isidayeli yaaba ŋantaadi kuli po.

Yaa Jufinba n ki den kali Jerusalemi

²⁵ Juda buolu bi tianba den kali a dobila leni a dobila nni. Bi den kali Kiriyati-Arba leni u dobila nni, Dibon leni u koajaana nni, Jekabitiseeli leni u dobila nni,

²⁶ Josue, Molada, Beti-Peleti,

²⁷ Hasari-Suali, Beri-Seba leni u dobila nni,

²⁸ Tisikilagi, Mekona leni u dobila nni,

²⁹ Eni-Rimoni, Tisoreya, Yarimuti,

³⁰ Sanoa, Adulami leni yi dobila nni, Lakisi leni u lindima, Aseka leni u dobila nni. Bi den kali kali ki cili Beri-Seba, ki taa ki yaa caa hali Hinomi joaloangu.

³¹ Benjamen buolu den kaa Geba dogi nni, Mikimasi, Aya, Beteli leni u dobila nni,

³² Anatoti, Nobi, Hanania,

³³ Hatisori, Rama, Gitayim,

³⁴ Hadidi, Tiseboyimi, Nebalati,

³⁵ Lodi, Ono leni a tuonsoanbanda Joaloangu nni.

³⁶ Li den baa Levi buolu, yaaba n taani Benjamen buolu po, ba ke bi den boagidi ki taani ba Juda buolu po.