Nahumi 3 - U TIENU MAAMA TILI 2013

Bi nikpaanba dogu Ninivi bodi

¹ Fala baa yaa ye leni yaa dogu Yaa niba n wuliti mi soama, Kelima bi dogu gbie mi faama leni ku tugumoangu. Laa dogu nni kan gbeni febu leni janbi mo.

² U dogu nni, i fibi mua, Ti toateliti kaanda mua waliwali, I taami tiini ke ti toateliti mo yugidi ki tuani.

³ Bi tanjagiba tiini ki caa mi janjanma po, Ke bi jugisiemu pelini, ke bi kpaana mo ñuliti. Yaaba n poagili yabi ki kandi, Ke yaaba n kpe kaa pia coali duogi duogi biyaba po. Bi niba tuudi bi tinkpiba ki baali.

Ninivi yaaba laa i fe

⁴ Ninivi dogu tie puoconconli, Yua n lidi bi niba yama leni o ŋamu. O boandi mi diema boncianla leni o conconma, Ki boandi i nibuoli boncianla leni o yanlidiga.

⁵ Li Miali Diedo U Paaciamu Kuli Daano yedi: «Li tie lani yaa po yo ke n baa fii ki sedi a po. N baa kaadi a tiayiekaadi, Ki teni i nibuoli kuli n le a mubima. I nibuoli kuli baa le a fe.

⁶ N baa wuli a po ti baadi ki cagini a. Bi niba kuli baa le ŋa ki kpaagi li po.

⁷ Yeni, yaaba n baa le ŋa kuli baa sani ki foagidi leni a, Ki yedi: ‹Ninivi dogu bodi. Ŋme nan baa mua likani yaaba po? Yaaba n baa baagi ba nan baa ña le?› »

Ninivi baa bodi nani Tebesi dogu yeni

⁸ Ninivi yaaba, naani yinba n cie Tebesi yaaba, Bani yaaba yaa dogu n den miabi U kpenciamu Nili kpentaana siiga, Ke mi ñima lindi ki cebini u, Ki guu nani u bilinciamu yeni?

⁹ Bi jigi den tie Etiopi leni Ejipiti diema N den kpendinni bi po yaa ŋalimano n ki pia bianu yene. Puti leni Libi yaaba den tie bi todikaaba.

¹⁰ Ama ba leni lani kuli, bi den gedini ba ti yonbidi, Ki kpa bi bila a sankada nni kuli, Ki toani tiatia bi badiba ki boagidi bi ŋmiali nni, Ki kpaa mi diema bulicinba kuli ti kpaadi.

¹¹ Yinba Ninivi yaaba moko baa le Fala hali ki yaa cuoni Ki fuundi nani yi ñuni ki gaadi yeni. Yimoko baa sani ki liini u wuonkaanu Ki bua ki ciadi yi yibalinba.

Ninivi yaaba kan go fidi ki mua jama

¹² Yi kaanpaali kuli tie kankankpiala, Bi yaa yoagi bu kankanbu, A baa baa yua n bua ki ŋmani a ñoabu nni.

¹³ Yi jakoanda tie nani bi puoba yeni. Yi diema buliñoana luodi ŋani aba yibali nintuali, Kelima u mu bolini a buliñoana sendabila.

¹⁴ Luuni mani mi ñima ki bogini yi yibalinba N baa ti gaani ki cebini yi dogu yaa yogunu po. Ŋanbi mani yi kaanpaali bilinciami, Ŋmaa mani ti tandi, Ki pua i tankonkuomi.

Ninivi yaaba sani ki bodi nani a tobiñaana yeni

¹⁵ Lankane ke u mu baa bolini yi cain, Ki jugisiega n kpa yi, Yin bodi nani a tobiñaana n ŋmani yaa faadi yeni.

¹⁶ Yi kpenda den yabi ki cie tanpoli ŋmabila. Bi den naani leni yaa tobiñaana n yugi. Moala bi ye le?

¹⁷ Yi guudikaaba den yabi nani a dondoba yeni, Yi bado naacenba mo nani yaa naaci kuli n jiidi, Ki maani ti fatudi po ti wadi yogunu yeni, U yienu yaa paagi, ban yugi ki bodi, Oba kan bandi ban teli naani.

¹⁸ Fini Asiiri bado, a guveneerinba kpe, A jakoanda guani ki kan go fundi. A niba yadi a juana nni, Oba mo kan gobidi ki taani ba.

¹⁹ Yaa yema n ŋmaa yi yeni, gaapo ki ye, A poagilima yeni baa ñani a miali. Yaaba n gbadi a bolinma laabaalo kuli Pua ti nupodi ki mangi bi pala, Kelima a biadima naa den pia kuli man lagidi yua.