Nahumi 2 - U TIENU MAAMA TILI 2013

Ninivi bolinma fuuli 2—3 Juda yaaba po

¹ Yinba Juda yaaba, diidi, Yua n baa waani o laabaalimano Cuoni a juana po ki kpendi. O wangi mi yanduanma maame. Yaa tiendi mani yi jaanma badi, Ki kuandi yin den niani U Tienu yaa ñoaniani, Kelima o nibiado kan go poandi yi diema nni. O bodi cain.

Ninivi yaaba po

² Yinba Ninivi yaaba, bi baa baa yi bu toabu. Guudi mani yi kaanpaali! Guudi mani yi dogi sani bonŋanla! Bogini mani bu toabu po! Paagi mani yi pala!

Juda yaaba po

³ O Diedo baa teni Jakob puoliŋuani leni Isidayeli yaaba N guani ki baa ban den kpa pia yaa kpiagidi, Hali ke bi yibalinba daa den baa ba, ki biidi bi duvenkuani.

Bi baa Ninivi yaaba ki fagi ba

⁴ Yaa toatieba n baa bolini Ninivi yeni gbankoanditi moani. Bi tiayiekaadi moani. Bi yaa bogini ki gbeni bu toabu po, Bi toateliti yen tuodi nani u mu yeni. Bi yaa cuoni, bi kpaana lengidi.

⁵ Ti toateliti tiini hali boncianla i sani nni Leni u dogu siiga nani yaa yandi n digi yeni. Yua n laa ba, bi naani leni i mukaani, Ki jalige nani mi tañigima yeni.

⁶ Ninivi bado yini ki taani o toatieba yudanba, Ama bi cuoni ki tuudi ki jadibi. Yibalinba jaligi ki pundi U dogu bilinciamu kani, Ki wuoni bi gbankafenciama nni.

⁷ Yibalinba dadi ki luodi leni u paalu Yaa buliñoaluoditi n goa i kpenciami po, Ke yaaba n ye badidiegu jie ki luodi.

⁸ Bi taa o bupua nannanli ki gedini li. Yaa puoba n tuuni li nannanli yeni po Pua bi bena leni li paboanli ki mua nani mu kpaajiemu yeni.

⁹ Bi niba tiini ki ña Ninivi nani yaa ñima N padi li ñinpagili ki tiini yeni. Bi yi ba ki tua: «Sedi mani, sedi mani!» Ama oba kuli ki gbegidi ki nua.

¹⁰ Fagi mani ŋanjilifa! Fagi mani wula! Ŋalimani dua u dogu yeni niinni kaa pia bianu. U gbie leni ŋalimani buoli, yii n ki pia coali.

¹¹ Bi kpa bi niba ki koadi ŋalimani ki biani u dogu fanma! Bi wudi bi niba gbani ki teni ke a duna pua aya! Bi niba jie ki luodi ke bi nunmu kuli gbidi.

Ninivi tie nani ban paadi yaa yangbanlo yene

¹² Ku yangbantuugu yeni go ye le moala? A yangbanbila den dua likani. O yangbanjoa, o yangbanñua Leni a yangbanbila den goadi likani Ke niloba ki pangi ba.

¹³ O yangbanjoa den co ti yandi o bila leni o puoba po, O tuugu den gbie leni wan den co yaa yandi nandi.

¹⁴ Li Miali Diedo U Paaciamu Kuli Daano yedi: «N baa fii yinba Ninivi yaaba po. N baa buoni yi toateliti, Ki teni bu toabu n je yi nipanba. N baa teni yin den fagini ti fagidi maama, N baa u bianu ŋanduna nni. N baa teni ke bi kan go gbadi yi tonda niali.»