Mi Coadima 8 - U TIENU MAAMA TILI 2013

Mu fidisanmu n baa yaa siendi maama

¹ O Diedo den maadi leni Musa,

² ke wan maadi leni Alono ki yedi o: «A yaa baa tuani mu fidisanmu yaa yogunu, ŋan yaa faami ki teni mu fidisanleleedimu yeni, yenma n yaa yendi u fidisantuankaanu nintuali po.»

³ Alono den tieni yene. O den tuani mu fidisanmu u fidisantuankaanu nintuali po, nani o Diedo n den puogi Musa maama.

⁴ Diidi u fidisantuankaanu n den tie maama: U den tie wula yua n kpiagi, ki cili u tiipo, ki yaa caa hali u tanpoli. U den tie ban pua ki tandi tandi yaa wula. Bi den tieni u fidisantuankaanu, nani o Diedo n den teni ke Musa laa li bonlekaala nni maama.

Levi buolu gagidima

⁵ O Diedo den maadi leni Musa, ki yedi:

⁶ «Ñani Levi buolu, Isidayeli yaaba siiga ki gagidi ki ŋanbi ba.

⁷ Diidi ŋan baa gagidi ki ŋanbi ba maama nne: Ŋan mii bi po ti tuonbiadi ŋuudima ñima. Li yaa puoli, bi baa koagidi bi gbanu kobidi kuli, ki ŋuudi bi tiayiekaadi, ki ŋanbi bi baa.

⁸ Lani yaa pendi, bi baa taa naatonbili leni yaa paabu n yegi leni la, ki taani leni yaa yoma n kali leni mi kpama. A baa taa li naatonbili, lin tua ti tuonbiadi sugili miabu padili.

⁹ A baa teni Levi buolu n nagini u Kadikaanu Gbandieli nintuali. Ŋan yini ki taani Isidayeli yaaba nitaanli kuli.

¹⁰ Ŋan teni Levi buolu n nagini o Diedo nintuali, ke Isidayeli yaaba n maani bi nii bi po.

¹¹ Alono baa tieni o Diedo nintuali, yaa maalima n doagidi ke Levi buolu tie o yaaba Isidayeli yaaba siiga. Bi baa gagidi ba o Diedo tuonli po.

¹² Levi buolu baa maani bi nii a naatona yeni yula po. A baa taa naatonyenli, ki padi ti tuonbiadi sugili miabu padili. Li naatonlieli mo, a baa padi li li padijuukaali o Diedo po, ki mia Levi buolu po, bi tuonbiadi sugili.

¹³ A baa teni Levi buolu n sedi Alono leni o bijaba nintuali, ŋan tieni yaa maalima n doagidi ke a taa ba ki puni mini o Diedo.

¹⁴ Ŋan paadi ki ñani Levi buolu Isidayeli yaaba siiga. Levi buolu baa yaa tie n yaaba.

¹⁵ Li yaa puoli, Levi buolu baa cua, ki soani u Kadikaanu Gbandieli tuonli. Yene, ke a baa gagidi ki ŋanbi ba. A baa tieni yaa maalima n doagidi ke a taa ba ki puni nni.

¹⁶ Bi tie min gandi yaaba Isidayeli yaaba siiga, ke bi gaa n po bani Isidayeli yaaba bonjakpiala kaanu, ki tie mini nbebe n die yaaba.

¹⁷ Mini n die bonjakpiaga kuli Isidayeli yaaba siiga. Ti yandi siiga moko, mini n die bontonkpiaga kuli. Min den kpa Ejipiti diema bonjakpiala kuli yaa daali, n den gagidi n yuli po bane.

¹⁸ Lanwani, n taa Levi buolu, ke bi gaa Isidayeli yaaba bonjakpiala kuli kaanu.

¹⁹ N den taa Levi buolu Isidayeli yaaba siiga, ki teni Alono leni o bijaba, ke ban yaa tuuni u Kadikaanu Gbandieli tuonli, ki baali ti candandi Isidayeli yaaba tuonbiadi po. Lani, Isidayeli yaaba kan go le falabuoluba kuli, kelima li baa sua ke Isidayeli yaaba nagini u kaangagidiŋamu.»

²⁰ Musa, Alono leni Isidayeli yaaba nitaanli kuli, den tieni o Diedo n den yedi Musa yaala Levi buolu po.

²¹ Levi buolu den ŋanbi bi yula, ki go ŋuudi bi tiayiekaadi. Alono den tieni yaa maalima n doagidi ke o teni ba o Diedo, ki den padi bi po ti tuonbiadi sugili miabu padili, ke wan gagidi ki ŋanbi ba.

²² Li yaa puoli, Levi buolu den cili ki tuuni u Kadikaanu Gbandieli nni, ke Alono leni o bijaba ŋua ki gobidi ba, nani o Diedo n den puogi Musa maama Levi buolu po.

²³ O Diedo den maadi leni Musa, ki yedi:

²⁴ «Diidi yaala n bili Levi buolu po: Levi buolu yua kuli, yaa pundi piilie n binamuu, o yen baa cili o tuonli, u Kadikaanu Gbandieli nni.

²⁵ O yaa ban pundi bina piimuu, o baa cedi ki kan go soani ban den puogi o yaa tuona.

²⁶ O baa yaa todi o kpiiba, ban pia yaa tuona u Kadikaanu Gbandieli nni. Ama wani o ba kan go yaa pia tuonceli. A baa tieni yene Levi buolu po, ban puogi ba yaa tuonli po.»