Mi Coadima 6 - U TIENU MAAMA TILI 2013

Yaa bali maama n ye yua niani po

¹ O Diedo den maadi leni Musa, ki yedi,

² ke wan maadi leni Isidayeli yaaba ki yedi ba: «Li yaa tie ke joa bi pua niani u ñoanianu, ki paadi o yuli ke o baa gagidi li U Tienu po, ki tua nianli yua,

³ o baa kubi o yuli, ki da ñu duven leni dabiadima. O kan ño yaa ñinmiligima n lanbi leni duven, bi yaa ñinmiligima n lanbi leni dabiadimiba. O kan ño yaa bonñokaala n ñani duventiidi bonluonkaala nni. O kan didi ŋmani i bonluonkaala yaala n soangi, bi yaala n kuodi.

⁴ Wan gagidi o yuli U Tienu po yaa dana nni yeni kuli, wan da ŋmani yaala n ñani duventiidi nni, ki cili li bonbii, ki yaa caa hali li poagidi.

⁵ Nasileya yua yeni dana nni kuli, pengu kan maani o yuli po, hali wan gagidi o yuli o Diedo po, yaa dana yeni n tuoni. O baa yaa tie yua n gagidi ki ŋani. O baa ŋaa o yudi n yaa yabidi ti yuli po.

⁶ Yaa yogunu ke o gagidi o yuli o Diedo po yeni kuli, o kan nagini tinkpilo.

⁷ Wan tugi o yuli po, o Tienu gagidima yeni po, o kan joagini o yuli, o baa bi o naa, o naataanjaga bi o naataanpuoga kuuma daali.

⁸ O nianli yogunu kuli nni, o baa gagidi ki yaa ŋani o Diedo po.

⁹ Li yaa tie ke nilo ludi ki kpe o kani, ke o yudi yaadi n gagidi yeni joagini, o baa kuo ti o ŋuudima daali. O baa kuo ti li daleleeli.

¹⁰ Li daniili, o baa cuani o kopadiciamo kani, kpaajefanmulie bi kpaajenawuundilie, u Kadikaanu Gbandieli buliñoabu kani.

¹¹ O kopadiciamo baa padi kpaajeyenga, ti tuonbiadi sugili po, ki kpaajeliega mo n tua li padijuukaali. Lani, o baa mia o po o tuonbiadi sugili, kelima wan den sii o kpiemo yeni po. Landaali, li nianli daano yeni, baa gagidi ki ŋanbi o yuli.

¹² O baa guani ki gagidi o yuli o Diedo po, ki padi yaa pebiga n pia binli o tagili po. Wan den kpa tieni yaa dana wani naa go taa, kelima o gagidima yeni den biidi.

¹³ Diidi yaa bali maama n bili li nianli daano po nne: O gagidima dana yaa tuoni u bianu, bi baa gagidi o u Kadikaanu Gbandieli buliñoabu kani.

¹⁴ O baa cuani o padili o Diedo po, yaa pebiga n pia binyenli, kaa pia poadoba kuli, li padijuukaali po. O go baa cuani pesalo yua n pia binyenli, kaa pia poadi, ti tuonbiadi sugili miabu padili po leni petonli, yaali n ki pia poadoba, mi taanyenma padili po.

¹⁵ O go baa cuani ki baabuoga, ke ki gbie leni yaa dupen n ki tieni dabinli leni yaa maada ke bi kali mi yoma leni mi kpama leni yaa lalaadi n ki pia dabinli, ke bi joagi ti mi kpama. O baa cuani, ban taani laa pada kuli leni mi pienma pada leni a ñincaba.

¹⁶ O kopadiciamo baa cuani laa paabu kuli o Diedo nintuali, ki go padi ki yanga yeni, ti tuonbiadi sugili miabu leni li padijuukaali po.

¹⁷ O baa padi li petonli, mi taanyenma padili o Diedo po, ki taani leni ki baabuoga n pia yaa dupen, ke waa pia dabinli yeni. O kopadiciamo baa padi mi pienma padili leni li ñincabili.

¹⁸ Li nianli daano yeni, baa kuo u Kadikaanu Gbandieli buliñoatuogili kani, o yudi yaadi n gagidi yeni. O baa taa o yuli yaali n gagidi yeni yudi, ki tieni ban cuoni yaa mu mi taanyenma padili po yeni niinni.

¹⁹ O yaa kuo ki gbeni, o kopadiciamo baa taa li petonli yeni bualaagu, ke ku ŋaani. Li nianli daano yaa kuo o yuli yaali n gagidi yeni, ki gbeni yaa yogunu, o kopadiciamo baa ñani ki baabuoga nni, yaa maada n ki pia dabinli yeni, yenli leni lalaayengu, ki tebini likuli, li nianli daano nii nni.

²⁰ O kopadiciamo baa yua ki tieni yaa bogidili n doagidi ke o teni la o Diedo. Li tie yaa bonla n gagidi ki ŋani. O kopadiciamo n baa diedi a pada yeni, ki taani leni li petonli yeni bengunli leni ban ñani o panli yaali yeni. Li yaa puoli, li nianli daano yeni baa fidi ki ño duven.

²¹ Lani n tie yaa bali maama n bili li nianli daano, yua n tieni ñoanianu po. Lani n tie o gagidima po, wan baa pa o Diedo yaala, ke laa taa leni o bonpiakaala n puni o wan tieni yaala. O baa tieni yaala n den bili wan tieni yaa ñoanianu po, nani o gagidima yeni bali maama n bili maama.»

Yin baa yaa gaaliti maama

²² O Diedo den maadi leni Musa, ki yedi:

²³ «Maadi Alono leni o bijaba ki yedi ke bi baa yen yaa gaaliti Isidayeli nanda:

²⁴ ‹O Diedo n seligi yi, ki kubi yi!

²⁵ O Diedo n nuali yi leni ki nunmanga, Ki pa yi o ŋanbili!

²⁶ O Diedo n noanli yi leni mi buama, Ki pa yi mi yanduanma!›

²⁷ Bi yen baa taa n yeli ki gaali Isidayeli yaaba. Lani, nmo baa seligi ba.»