Mi Coadima 5 - U TIENU MAAMA TILI 2013

Levi buolu gagidima leni a pada bali maama 5.1—10.10 Yaa niba n joagini

¹ O Diedo den maadi leni Musa, ki yedi:

² «Ŋan teni Isidayeli yaaba n deli ki ñani li nagili nni mi gbaadima n cuo yua, yua n pia fado, bi yua n joagini kelima o sii tinkpilo po.

³ Li yaa tie jaba bi puoba, yin ñani ba li nagili nni, ke ban da joagini li nagili, min ye yaali nni.»

⁴ Isidayeli yaaba den tieni yeni. Bi den tieni o Diedo n den yedi Musa yaala.

O nilo n baa guani ki ŋanbi o tagili maama

⁵ O Diedo den maadi leni Musa, ki yedi

⁶ ke wan yedi Isidayeli yaaba yaa maama n tie ne: «Joa bi pua yaa bii o lielo po, o tieni o Diedo po ti tuonbiadi.

⁷ O baa mia o tuonbiadi yeni sugili. Li daano baa guani ki guani, wan janbi ki baa yaa tiagu yeni, ki go maani li po, ku tiagu yeni dunga n pundi maama, bonlimuu siiga kuli, bonyenla. O baa teni likuli, wan bii yua yaa po yeni.

⁸ Li yaa tie ke ku tiagu yeni daano ki go ye, kaa go pia kuli o nilo yua ke bi baa teni o ku, bi baa teni ku o Diedo yo, o kopadiciamo, ke laa taa leni ban baa teni ban padi yaa petonli i tagili daano po, ki mia o po o tuonbiadi sugili miabu yeni.

⁹ O kopadiciamo n die, Isidayeli yaaba n cuani yaa paabu, ki gagidi bu U Tienu po kuli.

¹⁰ Nilo yaa gagidi yaala U Tienu po kuli, wan teni la o kopadiciamo. O yaa puni yaala o kopadiciamo mo, o kopadiciamo n die la.»

Ban baa bandi yaa pua n conbi maama

¹¹ O Diedo den maadi leni Musa, ki yedi,

¹² ke wan maadi leni Isidayeli yaaba, ki yedi ba: «Joa pua yaa janbi o, ki

¹³ conbi leni jatoa ke o calo ki bandi, o yaa joagini oba ŋasiili nni, ke laa pia siedoba, ke bi naa cuo o.

¹⁴ O calo yaa pia li nunponli yantiali, ki poni leni o pua, yua n joagini o yuli, bi o joa yaa pia li nunponli yantiali, ki poni leni o pua yua n ki joagini o baa yeni,

¹⁵ laa joa baa gedini o pua o kopadiciamo kani, ki go gedini o po li padili po, orje yoma kilo bonbitaa. O kan wuli mi yoma yeni po kpama, ki da maani lipo dugibila kelima li tie nunponli padili, tiadima padili, yaali n tiadi i tagili.

¹⁶ O kopadiciamo baa teni o pua yeni n nagini ki sedi o Diedo nintuali.

¹⁷ O kopadiciamo baa kabidi mi ñingagidikaama ti tandi tiagu nni, ki taa li gbandieli nni tama, ki tieni ma mi ñima yeni niinni.

¹⁸ O kopadiciamo baa teni o pua yeni n cua, ki sedi o Diedo nintuali. O baa yiliti o pua yeni yucabili, ki tieni o nuu nni mi tiadima padili leni li nunponli padili. O kopadiciamo baa yaa kubi o nuu nni, yaa ñima n to, ki kpendi nni ti solindi.

¹⁹ O kopadiciamo baa teni o pua yeni n poli, wan yedi o pua yeni: ‹Li yaa tie moamoani, ke jatoa kuli ki taani leni a, ŋan ye a calo diegu nni yaa yogunu, ke ŋaa lindi a calo puoli po, ki joagini a baa, mi ñintonma yaama n kpendinni ti solindi na, solindi n da nandi a.

²⁰ Ama li yaa tie moamoane, ke ŋan ye a calo diegu nni yaa yogunu, ke a lindi a calo puoli po, ki joagini a yuli, ki conbi leni jatoa›

²¹ O kopadiciamo baa teni o pua yeni n poli ti solindi poli, ki yedi o pua yeni: ‹O Diedo n soli a, ki teni ŋan tua a diema niba n baa yaa taagi yua yaa yeli, ki solini. O Diedo n teni a kali n kuodi, a tugu mo n piebi.

²² Wan teni mi ñintonma na, n kua a nuadi nni, ki piebi a tugu ki kuodi a kali.› O pua yeni baa guani gaa: ‹Amina! Amina!›

²³ O kopadiciamo baa diani ti solindi yeni li tili nni, ki yuandi ki duuni, ki ñani i diani yeni leni mi ñintonma yeni.

²⁴ O baa teni o pua yeni n ño yaa ñima n kpendinni ti solindi yeni. Yaa ñima n kpendinni ti solindi yeni, baa kua o nuadi nni, ki cuani li paboanli.

²⁵ O kopadiciamo baa gaa o pua yeni kani li nunponli padili, ki tieni yaa bogidi n doagidi ke o teni la o Diedo, ki maani la li padibinbinli po.

²⁶ O kopadiciamo baa yidi, laa padili kani nupuogu, ki juu li padibinbinli po, lan yaa tie li bontiadikaala. Li yaa puoli yo, ke o baa teni o mi ñima yeni, wan ño.

²⁷ O yaa teni ke o ñuni mi ñima yeni, li yaa tie ke o joagini oba, ki tudi o calo po, ki conbi leni jatoa, yaa ñima n kpendinni ti solindi yeni baa kua o niinni, ki cuani li paboanli. O tugu baa piebi, o kali mo n kuodi. Laa pua baa tua o niba siiga, ban baa yaa taagi yua yeli, ki solini.

²⁸ Ama li yaa tie ke o pua yeni ki joagini o ba, tagiliba kan yaa ye o po, wan go baa a bila mo.

²⁹ Lani n tie yaa bali maama n ye li nunponli po, yaa pua n cagini o yuli wan ye o calo diegu nni yaa yogunu, ki kandi ki ŋaa o calo ki ban joagini o yuli.

³⁰ Mi go tie yaa joa n pia li nunponli yantiali, ki poni o pua po. O kopadiciamo baa teni o pua n cua, ki sedi o Diedo nintuali, ki tieni o po laa bali maama kuli n yedi yaala.

³¹ Bi kan go tuni o puodaano tagiliba kuli, ama o pua yeni yaa pia i tagili, o tagili baa guani ki jiidi o yuli po.»